مسلسل کمی کے بعد آج تیل کی قیمتوں میں اضافہ، عالمی مارکیٹ سے بری خبر آگئی، اب کیا ہوگا؟ شہریوں میں تشویش کی لہر دوڑ گئی

عالمی مارکیٹ میں منگل کے روز خام تیل کی قیمتوں میں اضافہ ریکارڈ کیا گیا، تاہم مشرق وسطیٰ میں کشیدگی میں کمی اور عالمی سطح پر تیل کی سپلائی بڑھنے کے امکانات کے باعث قیمتوں میں تیزی محدود رہی ہے۔

عالمی رپورٹس کے مطابق برینٹ خام تیل کے سودوں میں 38 سینٹ کا اضافہ ہوا، جس کے بعد قیمت 72.37 ڈالر فی بیرل تک پہنچ گئی، جبکہ امریکی خام تیل ویسٹ ٹیکساس انٹرمیڈیٹ (WTI) کی قیمت میں 30 سینٹ اضافے کے بعد یہ 68.85 ڈالر فی بیرل ریکارڈ کی گئی۔

ماہرین کے مطابق عالمی تیل مارکیٹ اس وقت کئی عوامل کے درمیان توازن قائم کرنے کی کوشش کر رہی ہے۔ ایک جانب سپلائی کی بحالی اور پیداوار میں اضافے کے امکانات نے قیمتوں پر دباؤ رکھا ہوا ہے، جبکہ دوسری جانب امریکا اور ایران کے تعلقات میں غیر یقینی صورتحال کے باعث سرمایہ کار محتاط رویہ اختیار کیے ہوئے ہیں۔

تجزیہ کاروں کا کہنا ہے کہ مارکیٹ کی نظریں بالخصوص چین میں تیل کی طلب میں ممکنہ اضافے پر ہیں، کیونکہ دنیا کی بڑی معیشتوں میں توانائی کی طلب میں تبدیلی خام تیل کی قیمتوں پر براہ راست اثر انداز ہو سکتی ہے۔

رپورٹس کے مطابق امریکا اور ایران کے درمیان مذاکرات، آبنائے ہرمز میں بحری آمدورفت کی صورتحال اور خلیجی ممالک سے تیل کی برآمدات کی بحالی عالمی منڈی کے اہم عوامل بن چکے ہیں۔ جاپانی ملکیت کے سپر ٹینکرز بھی سعودی عرب سے خام تیل لے کر آبنائے ہرمز کے راستے روانگی کے لیے تیار ہیں، جسے عالمی سپلائی کے حوالے سے اہم پیش رفت قرار دیا جا رہا ہے

دوسری جانب متحدہ عرب امارات نے جون میں خام تیل کی پیداوار یومیہ 38 لاکھ بیرل سے تجاوز کر دی، جو اپریل 2020 کے بعد بلند ترین سطح ہے۔ اسی طرح اوپیک پلس نے اگست سے تیل کی پیداوار میں مزید 1 لاکھ 88 ہزار بیرل یومیہ اضافے پر اتفاق کیا ہے۔

ادھر سعودی عرب نے ایشیائی خریداروں کے لیے اپنے مرکزی خام تیل عرب لائٹ کی قیمت میں گزشتہ ماہ کے مقابلے میں 11 ڈالر فی بیرل کمی کی ہے، جسے دو دہائیوں سے زائد عرصے میں سب سے بڑی قیمت کمی قرار دیا جا رہا ہے۔

ماہرین کے مطابق آنے والے دنوں میں خام تیل کی قیمتوں کا انحصار عالمی طلب، پیداوار میں اضافے، مشرق وسطیٰ کی صورتحال اور بڑی معیشتوں کی پالیسیوں پر ہوگا۔