عالمی مارکیٹ میں تیل کی قیمتوں میں مزید کمی

عالمی منڈی میں تیل کی قیمتوں میں کمی، برینٹ خام تیل مزید سستا

عالمی مارکیٹ میں خام تیل کی قیمتوں میں مزید کمی ریکارڈ کی گئی ہے، جس کے بعد توانائی کے شعبے میں نئی پیش رفت سامنے آئی ہے۔

تفصیلات کے مطابق برینٹ خام تیل کی قیمت میں 1.94 ڈالر کی کمی ہوئی، جس کے بعد فی بیرل قیمت 93.09 ڈالر کی سطح پر آ گئی۔

اسی طرح امریکی ویسٹ ٹیکساس انٹرمیڈیٹ (WTI) کی قیمت میں 2.50 ڈالر کی کمی ریکارڈ کی گئی، جس کے بعد یہ 90.54 ڈالر فی بیرل پر پہنچ گیا۔

ماہرین کے مطابق عالمی منڈی میں قیمتوں میں کمی کی بڑی وجہ ایران اور امریکا کے درمیان کشیدگی میں کمی اور ممکنہ بہتری کی امیدیں ہیں، جس کے باعث سرمایہ کاروں کا رجحان تبدیل ہوا ہے۔

توانائی ماہرین کا کہنا ہے کہ اگر یہی رجحان برقرار رہا تو آنے والے دنوں میں عالمی سطح پر پیٹرولیم مصنوعات کی قیمتوں میں مزید کمی کا امکان ہے۔

پاکستان میں بھی حالیہ دنوں میں پیٹرول کی قیمت میں 4 روپے فی لیٹر کمی کی گئی ہے، جبکہ ماہرین کے مطابق عالمی منڈی میں کمی کا سلسلہ جاری رہا تو آئندہ قیمتوں میں مزید کمی بھی ہو سکتی ہے۔ حتمی فیصلہ حکومت وقت کرے گی۔