غیرت کے نام پر بیٹا اپنی بوڑھی ماں اور 60 سالہ شخص کو قتل کرکے فرار

پولیس نے دونوں افراد کی لاشوں کو تحویل میں لے کر ضروری قانونی کارروائی اور پوسٹ مارٹم کیلئے ہسپتال منتقل کردیا

صوبہ بلوچستان کے ضلع نصیر آباد کے علاقے کچھی بولان میں مبینہ طور پر غیرت کے نام پر دو افراد کو قتل کر دیا گیا، جن میں ایک 60 سالہ خاتون اور ایک 60 سالہ شخص شامل ہیں، پولیس نے ملزم کی گرفتاری کے لیے کارروائیاں شروع کر دی ہیں۔

پولیس کے مطابق افسوسناک واقعہ ایری گاؤں میں پیش آیا، جہاں ملزم نے مبینہ طور پر اپنی 60 سالہ والدہ اور ایک 60 سالہ شخص کو قتل کردیا، دونوں افراد کے قتل کا واقعہ مبینہ طور پر غیرت کے نام پر پیش آیا، واقعے کی اطلاع ملتے ہی پولیس جائے وقوعہ پر پہنچ گئی، تاہم ملزم پولیس کی آمد سے قبل ہی فرار ہونے میں کامیاب ہوگیا۔

بتایا گیا ہے کہ پولیس نے دونوں افراد کی لاشوں کو تحویل میں لے کر ضروری قانونی کارروائی اور پوسٹ مارٹم کیلئے ہسپتال منتقل کردیا، جب کہ واقعے کی مختلف پہلوؤں سے تحقیقات کی جا رہی ہیں اور ملزم کی گرفتاری کے لیے ممکنہ مقامات پر چھاپے مارے جا رہے ہیں، حکام کا کہنا ہے کہ واقعے کے محرکات اور دیگر حقائق تفتیش مکمل ہونے کے بعد مزید واضح ہوں گے۔