عالمی منڈی میں خام تیل کی قیمتوں میں 5 فیصد سے زائد کمی ریکارڈ کی گئی ہے، جس کے بعد برینٹ اور ڈبلیو ٹی آئی خام تیل کی قیمتیں کئی روز کی کم ترین سطح پر آ گئی ہیں۔
میڈیا رپورٹس کے مطابق عالمی منڈی میں خام تیل کی قیمتوں میں نمایاں کمی کا سلسلہ جاری ہے، جہاں جمعرات کے روز قیمتوں میں 5 فیصد سے زائد گراوٹ ریکارڈ کی گئی۔ تیل کی عالمی قیمتوں میں مسلسل کمی کو عالمی معیشت اور توانائی کی منڈی کے لیے اہم پیش رفت قرار دیا جا رہا ہے۔
بین الاقوامی مارکیٹ میں دورانِ ٹریڈنگ برینٹ خام تیل کی قیمت کم ہو کر 73 ڈالر فی بیرل تک آ گئی، جبکہ امریکی خام تیل (ڈبلیو ٹی آئی) 70 ڈالر فی بیرل میں فروخت ہوتا رہا۔ اسی طرح یو اے ای مربن خام تیل کی قیمت بھی کم ہو کر 66 ڈالر فی بیرل تک پہنچ گئی۔
ماہرین کے مطابق ایران اور امریکا کے درمیان سوئٹزرلینڈ میں ہونے والے حالیہ معاہدے کے بعد عالمی منڈی میں تیل کی فراہمی سے متعلق خدشات میں کمی آئی ہے، جس کے نتیجے میں خام تیل کی قیمتوں پر دباؤ بڑھا اور قیمتوں میں مسلسل کمی دیکھی جا رہی ہے۔
تجزیہ کاروں کا کہنا ہے کہ مشرق وسطیٰ میں کشیدگی کم ہونے اور تیل کی سپلائی بہتر ہونے کی توقعات نے سرمایہ کاروں کے اعتماد میں اضافہ کیا ہے، جس کے باعث عالمی منڈی میں خام تیل کی قیمتیں نیچے آ رہی ہیں۔
معاشی ماہرین کا خیال ہے کہ اگر خام تیل کی قیمتوں میں کمی کا موجودہ رجحان برقرار رہا تو دنیا کے مختلف ممالک میں ایندھن کی قیمتوں پر بھی مثبت اثرات مرتب ہو سکتے ہیں۔ پاکستان سمیت تیل درآمد کرنے والے ممالک کے لیے یہ صورتحال معاشی دباؤ میں کمی اور پٹرولیم مصنوعات کی قیمتوں میں ممکنہ ریلیف کا باعث بن سکتی ہے۔
عالمی منڈی میں خام تیل کی قیمتوں میں حالیہ کمی کے بعد پاکستان میں پیٹرولیم مصنوعات کی قیمتوں میں کمی کا امکان واضح ہو گیا ہے۔ ماہرین کے مطابق پیٹرول اور ہائی اسپیڈ ڈیزل کی قیمتوں میں 10 سے 15 روپے فی لیٹر تک کمی کی گنجائش موجود ہے۔اگر حکومت ٹیکسوں اور لیوی میں اضافہ نہ کرے تو عوام کو زیادہ ریلیف مل سکتا ہے، جس سے قیمتوں میں نمایاں کمی ممکن ہے۔
اوگرا کی جانب سے ابتدائی ورکنگ مکمل کی جا رہی ہے اور قیمتوں میں کمی کی سفارشات پر مشاورت جاری ہے۔ذرائع کے مطابق اوگرا آج شام تک اپنی سمری وزارت خزانہ کو ارسال کرے گا، جس کے بعد حتمی فیصلہ وزیراعظم کریں گے۔حکومتی اعلان پر عوام اور کاروباری حلقوں کی نظریں مرکوز ہیں، جبکہ اس بار قابل ذکر ریلیف کی توقع کی جا رہی ہے۔