یوکرین نے کہا ہے کہ ملک میں فضائی حملوں سے خبردار کرنے والی سرکاری ’ایئر الرٹ‘ ایپ کو مبینہ طور پر ہیک کر لیا گیا، جس کے نتیجے میں کیف اور دیگر علاقوں کے شہریوں کو جعلی پیغامات موصول ہوئے۔ان پیغامات میں تابکاری، کیمیائی حملے اور سڑکوں پر لڑائی کے خطرات سے خبردار کیا گیا، تاہم حکام نے واضح کیا کہ کوئی تابکاری کا خطرہ موجود نہیں تھا۔
یوکرینی فضائیہ کے مطابق یکم نومبر کی رات ایپ پر تقریباً 10:47 بجے کیف کے لیے تابکاری کے خطرے کا پیغام سامنے آیا، جس کے بعد کیمیائی خطرے اور دیگر جعلی انتباہات بھی جاری ہوئے۔ایک پیغام میں روس کے ’اوریشنک‘ ہائپرسونک میزائل کے داغے جانے کا بھی غلط دعویٰ کیا گیا۔ حکام نے شہریوں سے پرسکون رہنے اور صرف سرکاری ذرائع سے معلومات حاصل کرنے کی اپیل کی۔
یوکرین کی وزارتِ ڈیجیٹل ٹرانسفارمیشن نے ایپ کو عارضی طور پر بند کر دیا تاکہ ممکنہ سائبر حملے کی تحقیقات اور تکنیکی کام کیا جا سکے۔حکام کے مطابق سڑکوں پر نصب سائرن اور دیگر سرکاری انتباہی نظام کام کرتے رہے جبکہ کیف میں ’کیف ڈیجیٹل‘ ایپ بھی معمول کے مطابق اطلاعات فراہم کر رہی تھی۔