واپسی کا سلسلہ تیز! خیبر پختونخوا سے 2,400 سے زائد افغان مہاجرین افغانستان پہنچے

افغان مہاجرین کی تاریخی واپسی ،خیبر پختونخوا سے ایک دن میں ہزاروں افغان مہاجرین وطن پہنچ گئے۔

تفصیلات کے مطابق خیبر پختونخوا سے ایک دن میں 2,400 سے زائد افغان مہاجرین وطن واپس لوٹےخیبر پختونخوا کے غیر قانونی غیر ملکیوں کی واپسی کے لیے قائم سینٹرل کنٹرول روم کے اعداد و شمار کے مطابق، ایک دن میں 2,414 سے زائد افغان مہاجرین ٹورخم سرحد کے ذریعے افغانستان واپس لوٹ گئے۔

یہ واپسی اس صوبے میں غیر دستاویزی غیر ملکیوں کی واپسی کے جاری عمل کا حصہ ہے۔ سرکاری اعداد و شمار کے مطابق، اس دوران واپسی کرنے والے مہاجرین میں 1,742 ایسے افغان شامل تھے جن کے پاس پروف آف رجسٹریشن (PoR) کارڈ موجود تھا۔ اس کے علاوہ 186 افغان سٹیزن کارڈ (ACC) ہولڈر اور 686 غیر دستاویزی افغان مہاجرین بھی اپنے وطن واپس گئے۔

اعداد و شمار کے مطابق، 1,542 PoR کارڈ ہولڈر، 186 ACC ہولڈر اور 558 غیر دستاویزی مہاجرین نے رضا کارانہ طور پر واپس جانے کا فیصلہ کیا، جبکہ 128 افغان مہاجرین کو واپسی کے لیے مجبور کیا گیا یا ڈی پورٹ کیا گیا۔

اس واپسی مہم کے آغاز سے اب تک مجموعی طور پر 233,931 PoR کارڈ ہولڈرز، 71,964 ACC ہولڈرز، اور 688,004 غیر دستاویزی افغان مہاجرین خیبر پختونخوا سے افغانستان واپس جا چکے ہیں۔

یہ واپسی عمل تورخم، انگور اڈا اور خارلاچی سرحدی چوکیوں کے ذریعے جاری ہے اور صوبائی حکام کی نگرانی میں ہو رہا ہے۔

صوبائی حکام کا کہنا ہے کہ غیر دستاویزی افغان مہاجرین کی واپسی کا عمل جاری رہے گا اور ہر مرحلے پر انسانی ہمدردی اور محفوظ راستوں کو یقینی بنایا جا رہا ہے۔