خیبر پختونخوا حکومت نے شہریوں کیلئے میزبان پروگرام کا آغاز کر دیا،جانئے بلا سود قرضے کس کو ملیں گے؟

سیاحتی علاقوں کے مقامی افراد کو 30 لاکھ روپے تک بلا سود قرضے فراہم، وزیر اعلیٰ سہیل آفریدی نے باعزت روزگار اور معیاری سیاحتی سہولیات پر زور دیا

تفصلات کے مطابق خیبر پختونخوا حکومت نے مقامی سطح پر سیاحت کو فروغ دینے، روزگار کے مواقع پیدا کرنے اور معاشی خود کفالت کے لیے اہم اقدام اٹھاتے ہوئے ہوم اسٹے منصوبے کے تحت ’’میزبان پروگرام‘‘ کا آغاز کر دیا ہے۔ اس موقع پر وزیر اعلیٰ سہیل آفریدی نے پروگرام کے تحت بلا سود قرضوں کے چیکز بھی تقسیم کیے۔

وزیر اعلیٰ سہیل آفریدی نے کہا کہ اس منصوبے کا بنیادی مقصد سیاحت کے فروغ کے ساتھ ساتھ مقامی افراد کو باعزت روزگار فراہم کرنا ہے۔ انہوں نے بتایا کہ میزبان پروگرام کے ذریعے سیاحتی علاقوں کے رہائشیوں کو 30 لاکھ روپے تک بلا سود قرضے دیے جا رہے ہیں، اور اب تک مجموعی طور پر 95 افراد کو یہ چیکز فراہم کیے جا چکے ہیں۔

سرکاری بریفنگ کے مطابق، اس پروگرام کے تحت سوات، اپر چترال، لوئر چترال، اپر دیر، لوئر دیر، ایبٹ آباد اور مانسہرہ کے مقامی افراد کو قرضے فراہم کیے جا رہے ہیں۔ اس اقدام کا مقصد نہ صرف مقامی لوگوں کے لیے باعزت روزگار کے مواقع پیدا کرنا ہے بلکہ قومی اور بین الاقوامی سیاحوں کو نجی گھروں میں معیاری قیام کی سہولیات فراہم کرنا بھی ہے، تاکہ سیاحوں کو اپنائیت کے ساتھ بہتر خدمات میسر آئیں۔

وزیر اعلیٰ نے مزید کہا کہ ’’ہم نے پیسہ بھی کمانا ہے اور عزت بھی دینی ہے۔ پاکستان تحریک انصاف کی صوبائی حکومت محدود وسائل کے باوجود عوام میں سرمایہ کاری کر رہی ہے تاکہ ملک ترقی کی راہ پر گامزن ہو۔ 2022 سے آج تک قوم مہنگائی کی چکی میں پس رہی ہے جبکہ وفاق کے ذمے خیبر پختونخوا کے 4000 ارب روپے سے زائد کے بقایاجات واجب الادا ہیں۔‘‘

انہوں نے وفاقی حکومت پر بھی شدید تنقید کرتے ہوئے کہا کہ’’آئی ایم ایف کی رپورٹ کے مطابق وفاق میں 5300 ارب روپے کی کرپشن سامنے آئی ہے اور حکمران عوام کے پیسوں سے عیاشیاں کر رہے ہیں۔ عوام پر سرمایہ کاری ہی ملک کی ترقی کی ضمانت ہے، اور عوام کے مینڈیٹ پر ڈاکہ ڈالنے والوں کو سوچنا چاہیے کہ ملک کس سمت جا رہا ہے۔‘‘