قیدیوں کی سزا میں کمی، وزیراعلی سہیل آفریدی کا بڑا اعلان

وزیراعلیٰ خیبر پختونخوا محمد سہیل آفریدی نے سنٹرل جیل پشاورمیں44کروڑ کی لاگت سے مکمل ہونے والے جدید سیکیورٹی سسٹم کا افتتاح کیا۔

اس موقع پر وزیراعلیٰ نے میڈیکل وارڈاور ای وزٹ سسٹم کا جائزہ لیا ۔

دورے کے دوران وزیراعلیٰ نے قیدیوں سے ملاقات کی، ان کے مسائل سنے اور موقع پر فوری اقدامات کے احکامات جاری کیے۔

انہوں نے منشیات کے عادی قیدیوں کی بحالی کے مرکز اور ماڈل انٹرویو روم کا بھی افتتاح کیا۔

سہیل آفریدی نے صوبے کی جیلوں میں قیدیوں کی سزا میں دو ماہ کی خصوصی معافی کا اعلان کرتے ہوئے کہا کہ جرمانے ادا نہ کرنے والے قیدیوں کے جرمانے صوبائی حکومت برداشت کرے گی۔

قیدیوں کی سہولیات بہتر بنانے کے لیے وزیراعلیٰ نے سنٹرل جیل پشاور میں دو کروڑ روپے کے اضافی فنڈز کا اعلان کیا اور فوری شکایات کے ازالے کے لیے ڈیجیٹل کمپلینٹ سیل قائم کرنے کی ہدایت دی۔

انہوں نے صوبے کے تمام جیلوں کی سولرائزیشن کا بھی اعلان کیا۔ جیل میں اسپتال کے قیام اور کم عمر لڑکوں و خواتین کے لیے علیحدہ خصوصی سیلز قائم کرنے کے منصوبے پر بھی کام شروع کر دیا گیا ہے۔

سہیل آفریدی نے قیدیوں کے مسائل کے حل کے لیے آئندہ ہفتے دربار/کھلی کچہری منعقد کرنے کی ہدایت کی اور دیگر صوبوں میں قید خیبر پختونخوا کے قیدیوں کو اپنے صوبے منتقل کرنے کے لیے متعلقہ صوبوں کو خطوط بھیجنے کی ہدایت دی۔

پیرول اینڈ پروبیشن ایکٹ 2022 پر مؤثر اور سختی سے عملدرآمد کرنے کی ہدایت بھی دی گئی۔

وزیراعلیٰ نے کہا کہ جیل کا مقصد سزا نہیں بلکہ اصلاح ہے اور قیدی یہاں سے بہتر اور مفید شہری بن کر نکلیں۔

انہوں نے مزید کہا کہ حکومت انسانوں میں سرمایہ کاری کر رہی ہے اور اداروں کو مضبوط اور اصلاحی بنایا جائے گا۔

وزیراعلیٰ نے اعلان کیا کہ جنوری میں وہ سنٹرل جیل کا دوبارہ دورہ کریں گے اور توقع ہے کہ اس وقت تک تمام جائز مطالبات حل ہو جائیں گے۔

سہیل آفریدی نے سانحہ اے پی ایس پربات کرتے ہوئے کہا کہ ہر سال 16 دسمبر پورے ملک کے لیے ایک دلخراش دن ہے اور یہ سانحہ ملک و قوم کی تاریخ کا ایک دکھ بھرا واقعہ ہے۔