امریکا کے صدر ٹرمپ کی صحت ایک بار پھر خبروں کی زینت بن گئی ہے، جب ایک عوامی تقریب کے دوران ان کی گردن پر سرخ نشان دیکھے گئے۔ اس منظر کے سامنے آنے کے بعد سوشل میڈیا اور سیاسی حلقوں میں مختلف قیاس آرائیاں شروع ہو گئیں۔
صدر کے ذاتی معالج ڈاکٹر شان باربیلا نے وضاحت کرتے ہوئے کہا ہے کہ گردن پر ظاہر ہونے والی سرخی تشویش کا باعث نہیں۔ انہوں نے امریکی نشریاتی ادارے سی این این کو دیے گئے انٹرویو میں بتایا کہ صدر ٹرمپ گردن کے دائیں حصے پر ایک عام نوعیت کی کریم استعمال کر رہے ہیں، جو جلد کے حفاظتی علاج (پریوینٹو اسکن ٹریٹمنٹ) کے طور پر دی گئی ہے۔
ڈاکٹر باربیلا کے مطابق صدر ایک ہفتے تک یہ علاج جاری رکھیں گے جبکہ سرخی چند ہفتوں تک برقرار رہ سکتی ہے، تاہم بنیادی جلد کے مسئلے کی مزید تفصیل فراہم نہیں کی گئی۔
یہ واقعہ ایسے وقت سامنے آیا ہے جب چند ہفتے قبل 79 سالہ صدر کے ہاتھوں کی پشت پر نیل کے نشانات بھی دیکھے گئے تھے۔ اس حوالے سے صدر نے وضاحت کی تھی کہ یہ زیادہ مصافحہ کرنے اور روزانہ اسپرین کی نسبتاً زیادہ مقدار لینے کے باعث ہوئے۔
صدر کے معالج نے ایک بار پھر مؤقف اختیار کیا ہے کہ وہ مجموعی طور پر بہترین صحت میں ہیں۔ دوسری جانب سوشل میڈیا پر اس معاملے پر ملے جلے ردِعمل سامنے آئے ہیں۔ کچھ صارفین نے سخت تنقید کی جبکہ بعض کا کہنا ہے کہ اس عمر میں جلد پر سرخی یا معمولی مسائل غیر معمولی بات نہیں۔
Leave feedback about this