مشرقِ وسطیٰ میں سپلائی کے خدشات برقرار، تیل کی قیمتوں میں ہفتہ وار اضافے کا امکان

عالمی منڈی میں جمعے کو خام تیل کی قیمتوں میں معمولی کمی ریکارڈ کی گئی تاہم مشرقِ وسطیٰ سے تیل کی سپلائی میں ممکنہ رکاوٹوں کے خدشات اور امریکا میں تیل کے ذخائر توقعات سے زیادہ کم ہونے کے باعث قیمتیں ہفتہ وار اضافے کی جانب بڑھ رہی ہیں۔خبر رساں ادارے رائٹرز کے مطابق جمعے کو گرینچ معیاری وقت کے مطابق صبح 3 بج کر 52 منٹ پر برینٹ خام تیل کے مستقبل کے سودوں کی قیمت 71 سینٹ، یعنی 0.67 فیصد کمی کے بعد 105.21 ڈالر فی بیرل ہوگئی۔

امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت بھی 77 سینٹ، یعنی 0.79 فیصد گر کر 97.20 ڈالر فی بیرل پر آگئی۔رائٹرز کے مطابق جمعرات کو ڈبلیو ٹی آئی کی قیمت میں 3 فیصد سے زیادہ اضافہ ہوا تھا۔ امریکا میں خام تیل کے ذخائر میں توقع سے زیادہ کمی اس اضافے کی ایک اہم وجہ بنی۔سمندری طوفان کے باعث تیل کی پیداوار متاثر ہونے سے امریکی ذخائر میں کمی ریکارڈ کی گئی تھی۔ہفتے کے دوران اب تک برینٹ خام تیل کی قیمت میں 0.44 فیصد اضافہ ہوا ہے، جبکہ ڈبلیو ٹی آئی 5.81 فیصد مہنگا ہوچکا ہے۔