الوداع! 2026 ورلڈ کپ میرا آخری ٹورنامنٹ ہوگا، کرسٹیانو رونالڈو نے بالآخر حتمی اعلان کر دیا

عالمی شہرت یافتہ فٹبالر اور اسٹار اسٹرائیکر کرسٹیانو رونالڈو نے اعلان کیا ہے کہ 2026 کا فیفا ورلڈ کپ ان کے بین الاقوامی فٹبال کیریئر کا آخری عالمی ٹورنامنٹ ہوگا۔ اعلان نے شائقین کو حیران اور جذباتی کر دیا ہے۔

اسپین کے خلاف ورلڈ کپ کے پری کوارٹر فائنل سے قبل میڈیا سے گفتگو کرتے ہوئے 41 سالہ پرتگالی کپتان نے کہا کہ وہ اپنے قومی ٹیم کے ساتھ اس سفر کے آخری مرحلے سے بھرپور لطف اٹھانا چاہتے ہیں۔ ان کا کہنا تھا کہ وہ اس تجربے کو یادگار بنانا چاہتے ہیں، تاہم یہ ان کا آخری ورلڈ کپ ہوگا۔

رونالڈو نے کہا:“میں اس سفر سے جتنا ممکن ہو لطف اٹھانا چاہتا ہوں، یہ میرا آخری ورلڈ کپ ہوگا، لیکن مجھے امید ہے کہ کل میرا آخری میچ نہیں ہوگا۔”

پانچ مرتبہ بیلن ڈی اور ایوارڈ جیتنے والے اس لیجنڈری کھلاڑی نے مزید کہا کہ ان کے کیریئر کی کامیابی کا فیصلہ صرف ورلڈ کپ جیتنے سے نہیں ہوگا۔ ان کے مطابق انہوں نے گزشتہ دو دہائیوں سے زائد عرصے میں فٹبال کو اپنی مکمل توانائی دی ہے اور وہ مطمئن ہیں کہ انہوں نے کھیل کے لیے “ایک ہزار فیصد” محنت کی ہے۔

انہوں نے واضح کیا کہ بین الاقوامی فٹبال سے ریٹائرمنٹ کا وقت ضرور آئے گا، تاہم وہ اس بات کو یقینی بنانا چاہتے ہیں کہ وہ کھیل کو بہترین انداز میں الوداع کہیں۔ ان کا کہنا تھا کہ وہ ضمیر کے اطمینان کے ساتھ میدان چھوڑیں گے کیونکہ انہوں نے فٹبال کے لیے اپنی پوری کوشش کی ہے۔

اپنی عمر پر ہونے والی تنقید کے جواب میں رونالڈو نے کہا کہ وہ اب بھی اعلیٰ سطح پر پرفارم کر رہے ہیں اور فٹبال صرف مجبوری نہیں بلکہ ان کا جذبہ ہے۔ ان کے مطابق وہ ہر لمحے سے لطف اندوز ہو رہے ہیں اور اب بھی ٹیم کے لیے اہم کردار ادا کر رہے ہیں۔

رونالڈو نے اس ورلڈ کپ میں اپنی کارکردگی کا ذکر کرتے ہوئے بتایا کہ وہ اب تک 3 گول کر چکے ہیں اور اپنی فارم سے مطمئن ہیں۔ اس کے علاوہ وہ ایک اہم ریکارڈ بھی اپنے نام کر چکے ہیں، جب ازبکستان کے خلاف دو گول کرنے کے بعد وہ ورلڈ کپ کے چھ مختلف ایڈیشنز میں گول کرنے والے دنیا کے پہلے کھلاڑی بن گئے۔

فٹبال ماہرین کے مطابق رونالڈو کا یہ اعلان عالمی فٹبال میں ایک بڑے دور کے اختتام کی جانب اشارہ ہے، جس کے بعد کھیل میں ایک اہم خلا پیدا ہو سکتا ہے۔