نیشنل ڈیزاسٹر مینجمنٹ اتھارٹی (این ڈی ایم اے) نے 13 سے 17 مئی کے دوران ملک کے مختلف علاقوں میں ممکنہ موسمی صورتحال سے متعلق تازہ جائزہ رپورٹ جاری کر دی ہے۔
رپورٹ کے مطابق پنجاب، سندھ، خیبرپختونخوا، گلگت بلتستان اور آزاد کشمیر کے مختلف علاقوں میں آئندہ 12 سے 24 گھنٹوں کے دوران گرج چمک کے ساتھ بارشوں کا امکان ہے۔ بعض مقامات پر تیز ہواؤں اور ژالہ باری کی بھی پیشگوئی کی گئی ہے۔
گلگت بلتستان کے اضلاع گلگت، سکردو، ہنزہ، نگر، غذر، دیامر، استور، گانچھے، شگر اور کھرمنگ میں بارش اور گرج چمک متوقع ہے۔ آزاد کشمیر کے علاقوں مظفرآباد، نیلم ویلی، باغ، راولاکوٹ، کوٹلی، میرپور اور بھمبر میں بھی بارشوں کا امکان ظاہر کیا گیا ہے۔
خیبرپختونخوا کے چترال، دیر، سوات، کالام، مالاکنڈ، مانسہرہ، ایبٹ آباد، پشاور، نوشہرہ، مردان، کوہاٹ، ڈیرہ اسماعیل خان اور وزیرستان میں بارشوں کی پیشگوئی کی گئی ہے۔
اسلام آباد سمیت پنجاب کے مختلف علاقے جن میں مری، راولپنڈی، اٹک، چکوال، جہلم، سیالکوٹ، گوجرانوالہ، لاہور، فیصل آباد، جھنگ، اوکاڑہ، بہاولپور اور بہاولنگر شامل ہیں، وہاں بھی بارش، آندھی اور ژالہ باری کا امکان ہے۔
سندھ کے حیدرآباد، بدین، ٹھٹھہ، جامشورو اور میرپورخاص میں تیز ہواؤں کے ساتھ بارش متوقع ہے۔
این ای او سی کے مطابق 13 سے 16 مئی کے دوران بالائی علاقوں میں اچانک سیلاب کا خدشہ بھی موجود ہے۔ خیبرپختونخوا، گلگت بلتستان اور آزاد کشمیر کے پہاڑی ندی نالوں میں طغیانی اور مقامی سیلابی صورتحال پیدا ہو سکتی ہے۔
چترال میں دریائے چترال اور اس کے معاون ندی نالوں میں اچانک سیلاب کا خطرہ ظاہر کیا گیا ہے، جبکہ سوات، دیر، شانگلہ، بونیر، کوہستان، بٹگرام، طورغر، مانسہرہ، ایبٹ آباد اور مالاکنڈ کے ندی نالوں میں پانی کے بہاؤ میں اضافہ متوقع ہے۔
گلگت بلتستان اور آزاد کشمیر کے بعض علاقوں میں لینڈ سلائیڈنگ کے خطرات بھی بڑھ گئے ہیں۔
این ڈی ایم اے نے شہریوں کو ہدایت کی ہے کہ شدید موسمی صورتحال کے دوران غیر ضروری سفر سے گریز کریں، کمزور تنصیبات اور بجلی کے کھمبوں سے دور رہیں، جبکہ سیاح دریاؤں اور ندی نالوں کے قریب کیمپنگ سے اجتناب کریں۔
ضلعی انتظامیہ کو ریسکیو اور ڈی واٹرنگ مشینری تیار رکھنے کی ہدایت جاری کر دی گئی ہے، جبکہ نشیبی علاقوں کے رہائشیوں کو ممکنہ ہنگامی انخلا کے لیے تیار رہنے کا کہا گیا ہے۔