برف نے زندگی منجمد کر دی !بالائی علاقوں میں برفباری، راستے بند، پاک فوج کا ریسکیو آپریشن جاری

ملک کے بالائی علاقوں میں شدید برفباری اور سردی کی لہر نے نظامِ زندگی کو بری طرح متاثر کر دیا ہے۔ راستے بند، بجلی کا نظام درہم برہم اور متعدد افراد برف میں پھنس کر رہ گئے ہیں۔ پاک فوج اور سول انتظامیہ بڑے پیمانے پر ریسکیو اور امدادی کارروائیاں جاری رکھے ہوئے ہیں، تاکہ متاثرہ شہریوں اور سیاحوں کو محفوظ مقامات تک پہنچایا جا سکے۔

شدید برفباری کے نتیجے میں آزاد کشمیر متاثر
آزاد کشمیر کے بالائی اضلاع وادی نیلم، اپر نیلم، سدھنوتی، باغ اور ہٹیاں بالا میں مسلسل برفباری کے باعث سڑکیں مکمل طور پر بند ہو چکی ہیں۔ ضلع حویلی میں شدید برفباری کے دوران ایمبولینس سمیت تقریباً 25 گاڑیاں پھنس گئیں، جن میں خواتین اور بچوں سمیت تقریباً 100 افراد سوار تھے۔

پاک فوج نے فوری ریسکیو آپریشن کرتے ہوئے 32 افراد کو محفوظ مقامات پر منتقل کیا، اور ایک ایمبولینس میں موجود دو میتوں کو بھی نکال کر لواحقین کے حوالے کر دیا گیا۔ مظفرآباد میں کئی سال بعد برفباری ریکارڈ کی گئی، اور وادی نیلم میں دو مکانات منہدم ہو گئے، تاہم کسی جانی نقصان کی اطلاع نہیں ملی۔

خیبرپختونخوا اور ملاکنڈ میں بھی شدید اثرات
خیبرپختونخوا کے بالائی علاقوں میں بھی وقفے وقفے سے برفباری جاری ہے۔ وادی کاغان، دیربالا، کمراٹ اور لواری ٹنل میں شدید برفباری کے باعث رابطہ سڑکیں بند ہو گئی ہیں۔ ضلعی انتظامیہ نے سیاحوں کے داخلے پر پابندی عائد کر دی، جبکہ مقامی اور آنے والے مسافروں کو محفوظ مقامات پر روک لیا گیا۔
ملاکنڈ میں کئی سال بعد برفباری کے باعث درخت سڑکوں پر گر گئے، جس سے ٹریفک متاثر ہوئی۔ ضلع خیبر اور شانگلہ میں بھی ریسکیو آپریشن جاری ہے اور پھنسے افراد کو اسکول اور ہاسٹل میں منتقل کیا جا رہا ہے۔

گلگت بلتستان میں شاہراہ قراقرم بند، استور میں زندگی مفلوج
گلگت بلتستان میں شدید برفباری کے باعث چلاس اور اپر کوہستان میں شاہراہ قراقرم مختلف مقامات پر بند ہے۔ استور اور راما میڈوز، دیوسائی، نانگا پربت اور برزل ٹاپ میں 5 سے 6 فٹ برف جمع ہو چکی ہے، جس سے زمینی رابطہ منقطع ہو گیا ہے۔
ہنزہ، نگر اور وادی چیپورسن میں مقامی آبادی اور زلزلہ متاثرین کو شدید سردی اور مسلسل برفباری کا سامنا ہے۔ امدادی ادارے متبادل راستوں اور فضائی ذرائع کے ذریعے متاثرین تک ضروری سامان پہنچانے کی کوشش کر رہے ہیں۔

انتظامیہ اور شہری ہائی الرٹ
ضلعی انتظامیہ، ریسکیو ادارے اور پاک فوج بالائی علاقوں میں ہائی الرٹ ہیں۔ شہریوں اور سیاحوں کو غیر ضروری سفر سے گریز، موسمی صورتحال سے باخبر رہنے اور انتظامیہ کی ہدایات پر عمل کرنے کی ہدایت کی گئی ہے۔ محکمہ موسمیات کے مطابق آئندہ چند روز تک برفباری اور شدید سردی کا سلسلہ جاری رہنے کا امکان ہے، جس سے صورتحال مزید سنگین ہو سکتی ہے۔