تحریک تحفظ آئین پاکستان نے غیرجانبدار الیکشن کمیشن کے قیام اور صاف و شفاف انتخابات کرانے کا مطالبہ کرتے ہوئے کہا ہے کہ 8 فروری کو ملک بھر میں شٹر ڈاؤن اور پہیہ جام ہڑتال کرتے ہوئے یوم سیاہ منایا جائےگا۔
کراچی پریس کلب میں منعقدہ آل پارٹیز کانفرنس کے اعلامیے میں کہا گیا ہے کہ عوامی مینڈیٹ چھیننے والوں کے خلاف آئین کے آرٹیکل 6 کے تحت کارروائی ہونی چاہیے۔
اعلامیے کے مطابق سندھ حکومت عوام کو بنیادی سہولیات فراہم کرنے میں ناکام ہو چکی ہے جبکہ 26ویں اور 27ویں آئینی ترامیم کے ذریعے میڈیا کی آزادی کو محدود کر دیا گیا ہے۔ کانفرنس میں اپوزیشن جماعتوں نے ججوں کے جبری تبادلوں کی شدید مذمت کی۔
تحریک تحفظ آئین پاکستان نے عمران خان، بشریٰ بی بی اور دیگر سیاسی قیدیوں کی رہائی کا مطالبہ کرتے ہوئے عمران خان سے ملاقات پر عائد پابندی کو غیر آئینی قرار دیا اور اس کے خاتمے کا مطالبہ کیا۔ اس کے ساتھ ساتھ گرینڈ ڈیموکریٹک الائنس (جی ڈی اے) کے رہنماؤں پر قائم مقدمات کو جھوٹا قرار دے کر ان کی مذمت کی گئی۔
اعلامیے میں صحافیوں کے حقوق پر زور دیتے ہوئے پیکا ایکٹ کو کالعدم قرار دینے کا مطالبہ کیا گیا۔ صحافی مطیع اللہ جان پر درج مقدمات، معروف وکیل ایمان مزاری اور ان کے شوہر کے خلاف کارروائیوں کی بھی مذمت کی گئی۔
اپوزیشن اتحاد نے کہاکہ معاشی استحکام کا دارومدار سیاسی استحکام پر ہے، جبکہ ملک میں ملٹی نیشنل ادارے بند ہونے کے قریب ہیں۔ اعلامیے میں سیاسی کارکنوں کی جبری گمشدگیوں کے خاتمے اور خیبرپختونخوا میں منعقد جرگے پر عملدرآمد کا مطالبہ کیا گیا۔
پڑوسی ممالک کے حوالے سے اعلامیے میں کہا گیا کہ ایران پر بھی دباؤ بڑھایا جا رہا ہے، حکومت ممکنہ علاقائی بحرانوں کو مدنظر رکھتے ہوئے ہمسایہ ممالک کا اجلاس طلب کرے اور غزہ کی صورتحال پر پارلیمنٹ کا مشترکہ اجلاس بلایا جائے۔
Leave feedback about this