صارفین تیار ہو جائیں! 15 جنوری کو پاکستان بھر میں انٹرنیٹ کی رفتار متاثر ہو سکتی ہے

پاکستان بھر کے انٹرنیٹ صارفین کے لیے اہم خبر سامنے آئی ہے کہ 15 جنوری کو ملک میں انٹرنیٹ سروس متاثر ہو سکتی ہے۔

تفصیلات کے مطابق نیا ٹیل کمپنی نے اعلان کیا ہے کہ ایک اہم سب میرین انٹرنیٹ کیبل پر مرمتی کام شیڈول ہے، جس کے باعث صارفین کو سست رفتار انٹرنیٹ اور ممکنہ سروس میں تعطل کا سامنا کرنا پڑ سکتا ہے۔نیا ٹیل کے مطابق یہ مرمتی کارروائی دوپہر تقریباً 2 بجے شروع ہوگی اور تقریباً آٹھ گھنٹے تک جاری رہ سکتی ہے۔ اس دوران ملک بھر میں انٹرنیٹ کی کارکردگی متاثر ہونے کا خدشہ ہے۔ کمپنی کی جانب سے صارفین کو بھیجے گئے ای میل میں کہا گیا ہے کہ یہ مرمت بین الاقوامی سب میرین کیبل پر کی جا رہی ہے اور یہ ناگزیر ہے۔

کمپنی نے کیبل کی درست جگہ یا خرابی کی تفصیلات تو فراہم نہیں کیں، تاہم صارفین ممکنہ طور پر انٹرنیٹ کی رفتار میں کمی اور بعض اوقات مکمل تعطل کا سامنا کر سکتے ہیں۔ ماہرین کے مطابق سب میرین کیبلز پاکستان کے بین الاقوامی ڈیٹا ٹریفک کے لیے انتہائی اہم ہیں، اور ان میں کسی بھی قسم کی خرابی براؤزنگ، اسٹریمنگ، آن لائن ورک اور دیگر ڈیجیٹل خدمات پر براہ راست اثر ڈال سکتی ہے۔

یہ پہلا واقعہ نہیں ہے۔ یاد رہے کہ اس ماہ کے آغاز میں بھی ملک بھر میں انٹرنیٹ کی سست روی اور جزوی بندش کی شکایات سامنے آئی تھیں، جو ایک اپ اسٹریم انٹرنیٹ فراہم کنندہ میں خرابی کی وجہ سے دو دن سے زائد جاری رہیں۔

نیا ٹیل اور دیگر سروس فراہم کرنے والی کمپنیوں نے صارفین کو مشورہ دیا ہے کہ وہ مرمت کے دوران اپنی اہم آن لائن سرگرمیوں کی پیشگی منصوبہ بندی کریں تاکہ ممکنہ تعطل سے متاثر نہ ہوں۔

اس خبر نے نہ صرف صارفین میں تشویش پیدا کر دی ہے بلکہ آن لائن کاروبار کرنے والے اداروں کے لیے بھی الرٹ جاری کر دیا گیا ہے۔ شہریوں کو ہدایت دی گئی ہے کہ وہ 15 جنوری کو انٹرنیٹ کے استعمال کے حوالے سے احتیاطی تدابیر اختیار کریں اور اہم کام پہلے مکمل کر لیں۔