ملک کے بیشتر علاقوں میں سرد اور خشک موسم، یخ بستہ ہواؤں کا راج پنجاب، سندھ اور خیبرپختونخوا کے میدانی علاقوں میں دھند، پہاڑی علاقوں میں شدید سردی کی پیش گوئی
تفصیلات کے مطابق ملک کے بیشتر حصوں میں آئندہ 24 گھنٹوں کے دوران موسم سرد اور خشک رہنے کا امکان ہے، جبکہ بالائی اور پہاڑی علاقوں میں شدید سردی کی لہر برقرار رہنے کی توقع ہے۔ محکمہ موسمیات کے مطابق پنجاب، بالائی سندھ اور خیبرپختونخوا کے میدانی علاقوں میں رات اور صبح کے اوقات میں درمیانی سے شدید دھند چھائے رہنے کا امکان ہے، جس کے باعث حدنگاہ متاثر ہو سکتی ہے۔
محکمہ موسمیات کا کہنا ہے کہ خطۂ پوٹھوہار اور کشمیر کے بعض علاقوں میں صبح کے اوقات میں کہرا پڑ سکتا ہے، جبکہ یخ بستہ ہوائیں سردی کی شدت میں مزید اضافہ کریں گی۔
وفاقی دارالحکومت اسلام آباد میں موسم سرد اور خشک رہنے کی توقع ہے، تاہم رات اور علی الصبح دھند چھائے رہنے کا امکان ہے، جس سے شہریوں کو آمد و رفت میں مشکلات کا سامنا ہو سکتا ہے۔
پنجاب کے بیشتر اضلاع میں موسم سرد اور خشک رہے گا، جبکہ مری، گلیات اور گردونواح میں شدید سردی متوقع ہے۔ سیالکوٹ، نارووال، جہلم، گوجرانوالہ، گجرات، لاہور، شیخوپورہ، اوکاڑہ، قصور، ساہیوال، خانیوال، فیصل آباد، جھنگ، لیہ، بھکر، نورپور تھل، ڈی جی خان، راجن پور، شورکوٹ، ملتان، کوٹ ادو، بہاولنگر، خانپور، بہاولپور اور رحیم یار خان میں درمیانی سے شدید دھند پڑنے کی پیش گوئی کی گئی ہے۔
سندھ کے بیشتر اضلاع میں بھی موسم سرد اور خشک رہنے کا امکان ہے، جبکہ سکھر، روہڑی، شکارپور، کشمور، شہید بینظیر آباد، دادو، لاڑکانہ، ٹنڈوجام، موہنجوداڑو اور گردونواح میں دھند چھائے رہنے کی توقع ہے۔
خیبرپختونخوا کے زیادہ تر اضلاع میں موسم سرد اور خشک رہے گا، تاہم پہاڑی علاقوں میں شدید سردی کا امکان ظاہر کیا گیا ہے۔ پشاور، مردان، نوشہرہ، چارسدہ، صوابی، بنوں، کرک، لکی مروت، ڈی آئی خان اور اطراف کے علاقوں میں درمیانی سے شدید دھند متوقع ہے۔
گلگت بلتستان میں موسم شدید سرد اور خشک رہنے کی پیش گوئی کی گئی ہے، جبکہ کشمیر میں بھی شدید سردی کا راج رہے گا، تاہم صبح کے اوقات میں بعض مقامات پر کہرا پڑنے کا امکان ہے۔
محکمہ موسمیات نے شہریوں اور مسافروں کو دھند کے دوران احتیاطی تدابیر اختیار کرنے اور غیر ضروری سفر سے گریز کرنے کا مشورہ دیا ہے۔
Leave feedback about this