امریکا نے افغان مہاجرین کے لیے ہر دروازہ بند کر دیا، تمام امیگریشن چینلز معطل

امریکی حکومت نے افغان باشندوں کے لیے تمام امیگریشن چینلز بند کر دیے ہیں، جس کا مقصد امریکی قومی سلامتی کو لاحق خطرات سے نمٹنا بتایا گیا ہے۔

تفصیلات کے مطابق افغان طالبان کی شدت پسند پالیسیوں اور دہشت گردوں کی سرپرستی کے پیشِ نظر یہ سخت اقدامات نافذ کیے گئے ہیں۔واشنگٹن پوسٹ رپورٹ کے مطابق، امریکی صدر ڈونلڈ ٹرمپ نے نیا صدارتی حکم جاری کیا ہے، جس کے تحت افغان اسپیشل امیگرنٹ ویزا ہولڈرز کے لیے دستیاب حفاظتی استثنیٰ ختم کر دیا گیا ہے۔ اس حکم کے بعد امریکی افواج کے ساتھ کام کرنے والے افغان نژاد افراد کسی بھی امریکی تحفظ سے محروم ہو گئے ہیں۔

یہ پابندیاں اس وقت سخت کی گئی ہیں جب گزشتہ ماہ افغان نژاد ایک شخص نے نیشنل گارڈ کے اہلکاروں پر فائرنگ کر کے ایک کو ہلاک اور دوسرے کو زخمی کر دیا تھا۔ اس واقعے کے بعد امریکی انتظامیہ نے افغان شہریوں کی امیگریشن اور تحفظ کے تمام چینلز معطل کر دیے۔

واضح رہے کہ ‘آپریشن الائز ویلکم’ اس پروگرام کے تحت قائم کیا گیا تھا تاکہ افغانستان میں امریکی فوج اور سفارتی مشنز کی مدد کرنے والے افغان شہریوں کو دوبارہ آباد کیا جا سکے۔ تاہم وائٹ ہاؤس نے تصدیق کی ہے کہ اس پروگرام کو جامع جائزے کے بعد معطل کر دیا گیا ہے۔

ہوم لینڈ سکیورٹی کی سیکرٹری کرسٹی نویم نے اپنے ایک حالیہ انٹرویو میں خبردار کیا کہ تقریباً ایک لاکھ افغان شہری جو امریکہ میں دوبارہ آباد کیے جانے والے تھے، ان کی مکمل جانچ پڑتال ممکنہ طور پر نہیں ہوئی تھی۔ سی آئی اے کے سابق خفیہ آپریشنز افسر مائیک بیکر نے فوکس بزنس کو ان خدشات کی تصدیق کی اور کہا کہ افغان باشندوں کے مکمل پس منظر کی جانچ پڑتال کے بغیر انہیں امریکہ لانا قومی سیکیورٹی کے لیے خطرناک ہو سکتا ہے۔ انہوں نے کہا کہ کسی بھی دوبارہ آبادکاری کی کوشش سے قبل ویٹنگ سسٹم کو مضبوط کرنا ضروری ہے۔

واشنگٹن پوسٹ کے مطابق افغانستان ان بارہ ممالک میں شامل ہے جن پر مکمل سفری پابندیاں عائد ہیں۔ ان پابندیوں کی زد میں مترجمین بھی آتے ہیں جو امریکی افواج کے لیے کام کر چکے ہیں۔

ٹرمپ انتظامیہ نے افغان طالبان کی شدت پسندی اور پالیسیوں کو عالمی امن کے لیے خطرہ قرار دیتے ہوئے کہا ہے کہ یہ اقدامات امریکی سلامتی کے تحفظ کے لیے ناگزیر ہیں۔