پشاور میں بارش کیلئے نماز استسقا کا اہتمام

صوبائی دارالحکومت پشاوراور گردونواح میں طویل خشک سالی کیوجہ سے نماز استسقاکا اہتمام کیاجارہاہے

تفصیلات کے مطابق پشاور اور گرد و نواح میں طویل خشک سالی کے پیش نظر جناح پارک میں باران رحمت کے لیے نماز استسقاء ادا کی گئی۔ اس موقع پر امامت خیبرپختونخوا کے چیف خطیب مولانا طیب قریشی نے کی، جنہوں نے خصوصی دعاؤں کے ساتھ بارش کی ضرورت پر زور دیا۔

مولانا طیب قریشی نے کہا کہ موسمیاتی حالات کے پیش نظر خدشات بڑھ گئے ہیں اور موسمی تبدیلی کے اثرات قابل تشویش ہیں۔ انہوں نے کہا کہ موجودہ سیاسی انتشار اور ملک میں بدامنی کے پیش نظر نماز استسقاء کی ادائیگی نہایت ضروری ہے۔

چیف خطیب نے عوام سے اپیل کی کہ وہ دعا اور نیک عمل کے ذریعے ملک میں خوشحالی اور امن کے لیے اپنا کردار ادا کریں۔ نماز استسقاء میں شرکت کرنے والوں نے بھی بارش اور ملک کی سلامتی کے لیے پرخلوص دعائیں کیں۔

یہ اقدام خشک سالی سے متاثرہ علاقوں میں پانی کی قلت کے مسئلے اور ملک میں سکون و استحکام کے لیے مثبت قدم کے طور پر دیکھا جا رہا ہے۔