خواجہ آصف کا شدید الزام، بانی پی ٹی آئی کی بہن کا بھارتی میڈیا انٹرویو تابوت میں آخری کیل، پی ٹی آئی دہشتگردی کی مخالفت اور پاکستان مخالف بیانات کی مذمت سے محروم
تفصیلات کے مطابق وزیر دفاع خواجہ محمد آصف نے پی ٹی آئی اور اس کے قائدانہ رویے پر شدید تنقید کرتے ہوئے کہا ہے کہ بانی پی ٹی آئی ہمیشہ سیاستدانوں سے بات کرنے سے انکار کرتے رہے، اور ان کی بہن کا بھارتی میڈیا کے ساتھ حالیہ انٹرویو ’’تابوت میں آخری کیل‘‘ ثابت ہوا۔
وزیر دفاع نے کہا کہ تحریک انصاف نے دہشتگردی کے خلاف جنگ کو دل سے اپنایا ہی نہیں، بلکہ اس کی کھلی مخالفت کی ہے۔ انہوں نے واضح کیا کہ پی ٹی آئی نے پاکستان اور پاک فوج کے خلاف بیانات کی کبھی مذمت نہیں کی، لیکن اسٹیبلشمنٹ سے بات کرنے پر زور دیا جاتا رہا۔
خواجہ آصف نے پیپلزپارٹی اور مسلم لیگ ن کے رویوں کا ذکر کرتے ہوئے کہا کہ ان پارٹیوں نے کبھی 9 مئی جیسے اقدامات نہیں کیے، اور پاکستان کی سالمیت کے خلاف بھارت کو انٹرویو دینے یا کوئی بیان جاری کرنے کی نوبت نہیں آئی۔ انہوں نے مزید کہا کہ نواز شریف کو جیل میں رکھا گیا، ان کو تین بار ہٹایا گیا، لیکن کبھی ریڈ لائن عبور نہیں کی گئی۔
وزیر دفاع نے کہا کہ پی ٹی آئی کے لوگ طالبان کو مالی مدد فراہم کرتے ہیں، اور پارٹی نے اپنے کسی رہنما کی پاکستان مخالف بات پر کبھی مذمت نہیں کی۔ انہوں نے خیبرپختونخوا کے وزیراعلیٰ پر بھی تنقید کی اور کہا کہ وہ دہشتگردی کے خلاف جنگ میں مؤثر کردار ادا نہیں کر رہے۔
خواجہ آصف نے کہا کہ سوشل میڈیا پر پی ٹی آئی کے ردعمل اور بیانات بانی پی ٹی آئی کی مرضی سے چلائے جا رہے ہیں اور پچھلے چند سال سے پیدا ہونے والی تلخیوں کی ذمہ داری بھی بانی پی ٹی آئی پر عائد ہوتی ہے۔ ان کے مطابق، آج جو ردعمل سامنے آیا وہ پی ٹی آئی کی پالیسیوں اور رویوں کی وجہ سے فطری تھا۔
Leave feedback about this