چیف جسٹس قاضی فائز کی ریٹائرمنٹ، فل کورٹ ریفرنس

اسلام آباد:چیف جسٹس آف پاکستان جسٹس قاضی فائز عیسی کا عدالت عظمی کے اعلی ترین جج کی حیثیت سے آج آخری دن، انکی ریٹائرمنٹ کے حوالے سے فل کورٹ ریفرنس کا آغاز ہو گیا۔ریفرنس سپریم کورٹ کمرہ عدالت نمبر ایک میں ساڑھے 10 بجے شروع ہوا جس میں چیف جسٹس قاضی فائز عیسی اور نامزد چیف جسٹس یحیی آفریدی سمیت 16 ججز شریک ہیں۔ریفرنس میں نامزد چیف جسٹس یحیی آفریدی، جسٹس امین الدین خان، جسٹس جمال خان مندوخیل، جسٹس محمد علی مظہر، جسٹس حسن اظہر رضوی، جسٹس شاہد وحید، جسٹس مسرت ہلالی، جسٹس عرفان سعادت خان، جسٹس نعیم اختر افغان، جسٹس شاہد بلال حسن اور جسٹس عقیل عباسی شریک ہیں۔
الوداعی ریفرنس میں ایڈہاک ججز جسٹس سردار طارق مسعود اور جسٹس مظہر عالم میاں بھی شریک ، شرعی عدالتی بنچ کے دو عالم ججز بھی فل کورٹ ریفرنس میں موجود ہیں، الوداعی ریفرنس میں 12 مستقل جج صاحبان، 2 ایڈہاک ججز اور 2 عالم ججز شریک ہیں۔ جسٹس منصور علی شاہ رخصت پر ہونے کی وجہ سے فل کورٹ ریفرنس میں شریک نہیں ہیں، ان کے علاوہ جسٹس ملک شہزاد، جسٹس اطہر من اللہ، جسٹس منیب اختر اور جسٹس عائشہ ملک بھی ریفرنس میں شریک نہیں ہیں۔
ریفرنس کا آغاز قرآن پاک کی تلاوت سے کیا گیا جس کے بعد فل کورٹ ریفرنس سے خطاب کرتے ہوئے اٹارنی جنرل منصور اعوان نے کہا ہے کہ چیف جسٹس قاضی فائز عیسی نے خود کو بطور قابل وکیل منوایا، چیف جسٹس قاضی فائز عیسی نے بلوچستان بار ایسوسی ایشن کی بھی نمائندگی کی۔چیف جسٹس قاضی فائز عیسی نے بلوچستان میں تعلیمی نظام کی روانی یقینی بنائی، انہوں نے بلوچستان میں جنگلی حیات کو بچانے کے لیے اہم کردار ادا کیا۔