بانی پی ٹی آئی عمران خان سے متعلق سپریم کورٹ کے اہم فیصلے کے بعد مسلم لیگ ن کے قائد نواز شریف کی سیاسی و انتظامی سرگرمیوں میں ایک بار پھر تیزی دکھائی دینے لگی ہے۔ نواز شریف مسلسل دوسرے روز 90 شاہراہ قائداعظم پہنچے جہاں انہوں نے پارٹی رہنماؤں اور ارکان اسمبلی سے ملاقاتیں کیں اور لاہور میں جاری ترقیاتی منصوبوں پر تفصیلی بریفنگ لی۔
نواز شریف کی گزشتہ چند روز سے بڑھتی ہوئی سرگرمیوں کو سیاسی حلقوں میں خصوصی اہمیت دی جارہی ہے خصوصاً ایسے وقت میں جب ملکی سیاست میں عمران خان سے متعلق سپریم کورٹ کے فیصلے کے بعد نئی سیاسی بحث شروع ہوئی ہے۔
نواز شریف نے 90 شاہراہ قائداعظم پہنچ کر پارٹی رہنماؤں اور ارکان اسمبلی سے ملاقات کی اس موقع پر لاہور میں جاری مختلف ترقیاتی منصوبوں کی پیش رفت کا جائزہ لیا گیا اور انہیں منصوبوں کی تکمیل کے حوالے سے بریفنگ دی گئی۔
نواز شریف کو داتا دربار کمپلیکس نیلا گنبد اور ناصر باغ پارکنگ پلازہ سمیت مختلف منصوبوں پر ہونے والی پیش رفت سے آگاہ کیا گیا۔
انہوں نے متعلقہ حکام اور پارٹی رہنماؤں کو ترقیاتی منصوبوں پر کام کی رفتار مزید تیز کرنے اور انہیں جلد مکمل کرنے کی ہدایت کی۔
مسلم لیگ ن کے قائد نے بھاٹی چوک انڈر پاس کا بھی دورہ کیا جہاں انہوں نے جاری تعمیراتی کام کا جائزہ لیا۔
اس موقع پر انہیں بھاٹی چوک اور داتا دربار کمپلیکس سے متعلق منصوبوں کی پیش رفت اور تعمیراتی کام کی رفتار کے بارے میں بریفنگ دی گئی۔
نواز شریف نے منصوبوں کو مقررہ اہداف کے مطابق مکمل کرنے پر زور دیا۔
نواز شریف کی مسلسل دوسرے روز 90 شاہراہ قائداعظم آمد ایک ایسے وقت میں ہوئی ہے جب گزشتہ چند دنوں کے دوران بھی ان کی سیاسی اور عوامی سرگرمیوں میں اضافہ دیکھا گیا ہے۔
پارٹی ذرائع اور سیاسی حلقوں میں نواز شریف کی حالیہ مصروفیات کو مسلم لیگ ن کی آئندہ سیاسی حکمت عملی کے تناظر میں بھی دیکھا جارہا ہے۔ وہ پارٹی رہنماؤں ارکان اسمبلی اور حکومتی ذمہ داران سے رابطوں میں ہیں جبکہ لاہور کے ترقیاتی منصوبوں پر بھی براہ راست نظر رکھے ہوئے ہیں۔
نواز شریف کی جانب سے ترقیاتی منصوبوں کے دوروں اور پارٹی رہنماؤں سے ملاقاتوں کا سلسلہ ایسے وقت میں تیز ہوا ہے جب ملک میں سیاسی ماحول ایک بار پھر گرم ہے۔
بانی پی ٹی آئی عمران خان سے متعلق سپریم کورٹ کے حالیہ فیصلے نے ملکی سیاست میں نئی بحث چھیڑ دی ہے۔ عدالت عظمیٰ نے عمران خان کو طبی معائنے اور علاج کے لیے شفا انٹرنیشنل ہسپتال منتقل کرنے سمیت اہل خانہ سے ملاقات اور دیگر سہولیات فراہم کرنے کا حکم دیا ہے۔
اس فیصلے کے بعد حکومت کی جانب سے نظرثانی کے لیے سپریم کورٹ سے رجوع کرلیا ہے جبکہ مختلف سیاسی رہنماؤں کی جانب سے فیصلے پر ردعمل کا سلسلہ جاری ہے۔
اسی سیاسی پس منظر میں نواز شریف کی لاہور میں مسلسل بڑھتی ہوئی سرگرمیوں کو اہم قرار دیا جارہا ہے۔
نواز شریف کی حالیہ سرگرمیوں میں ایک طرف لاہور کے ترقیاتی منصوبوں پر توجہ نمایاں ہے تو دوسری جانب پارٹی رہنماؤں اور ارکان اسمبلی سے رابطے بھی بڑھ رہے ہیں۔
سیاسی مبصرین کے مطابق موجودہ صورتحال میں نواز شریف کا دوبارہ زیادہ فعال انداز میں سامنے آنا مسلم لیگ ن کے لیے سیاسی طور پر اہم ہوسکتا ہے۔ تاہم ان کی حالیہ سرگرمیوں میں ترقیاتی معاملات اور پارٹی رابطے نمایاں ہیں اور آئندہ دنوں میں ان کی سیاسی مصروفیات کس سمت اختیار کرتی ہیں، اس پر سیاسی حلقوں کی نظریں مرکوز ہیں
