دنیا کے طاقتور اور کمزور ترین پاسپورٹس کی تازہ فہرست جاری کر دی گئی ہے، جس میں ایشیائی ملک سنگاپور ایک بار پھر پہلے نمبر پر براجمان ہے۔
عالمی ادارے Henley Passport Index کی رپورٹ کے مطابق سنگاپور کے شہری بغیر ویزا 192 ممالک کا سفر کر سکتے ہیں، جو دنیا میں سب سے زیادہ رسائی سمجھی جاتی ہے۔ دوسرے نمبر پر جاپان، جنوبی کوریا اور متحدہ عرب امارات مشترکہ طور پر موجود ہیں، جہاں کے شہری 187 ممالک تک ویزا فری رسائی رکھتے ہیں، جبکہ ناروے اور سوئٹزرلینڈ 185 ممالک کے ساتھ نمایاں ہیں۔
رپورٹ میں بتایا گیا ہے کہ یورپی ممالک مجموعی طور پر پاسپورٹ کی طاقت میں سبقت رکھتے ہیں، اور یورپی یونین کے شہریوں کو اوسطاً 183 ممالک تک ویزا فری رسائی حاصل ہے، جو ملائیشیا اور برطانیہ کے برابر ہے۔
دوسری جانب کمزور پاسپورٹس کی فہرست میں افغانستان سب سے آخری نمبر پر ہے، جہاں شہری صرف 23 ممالک تک بغیر ویزا سفر کر سکتے ہیں۔ اس کے بعد شام اور عراق کا نمبر آتا ہے، جبکہ پاکستان کمزور پاسپورٹس میں چوتھے نمبر پر ہے۔ پاکستانی پاسپورٹ رکھنے والے افراد کو 31 ممالک میں ویزا فری داخلے کی سہولت حاصل ہے۔
ماہرین کے مطابق کسی بھی ملک کے پاسپورٹ کی طاقت اس کی سفارتی حیثیت، معاشی استحکام اور عالمی تعلقات کی عکاسی کرتی ہے۔ مضبوط پاسپورٹ رکھنے والے ممالک کے شہریوں کو زیادہ سفری آزادی حاصل ہوتی ہے، جبکہ کمزور پاسپورٹس والے ممالک کو سیاسی عدم استحکام، تنازعات اور ہجرت جیسے چیلنجز کا سامنا رہتا ہے، جس کے باعث ان پر ویزا پابندیاں زیادہ ہوتی ہیں۔