پیٹرول بحران میں کمی کی امید! تیل کی فراہمی میں اہم پیش رفت، 3 جہاز کل پاکستان پہنچیں گے

پیٹرول کے 3 جہاز کل پاکستان پہنچنے کی توقع، سندھ حکومت اور وفاقی حکام نے توانائی صورتحال پر اہم اجلاس کیا

پیٹرول کی فراہمی میں بہتری کی امید ہے کیونکہ کل تک پیٹرول کے تین جہاز پاکستان پہنچنے کی توقع ہے۔ وزیراعلیٰ سندھ مراد علی شاہ نے وفاقی وزیر خزانہ محمد اورنگزیب اور وزیر پیٹرولیم علی پرویز ملک کے ہمراہ توانائی اور ایندھن کی موجودہ صورتحال پر اجلاس میں تفصیلی جائزہ لیا۔

اجلاس میں صوبائی وزیر داخلہ ضیا الحسن لنجار، چیف سیکرٹری سندھ، سیکرٹری توانائی اور دیگر اعلیٰ حکام بھی شریک تھے۔ حکام نے عالمی توانائی منڈی میں جاری اتار چڑھاؤ، ملک میں ایندھن کے ذخائر اور ممکنہ توانائی بحران سے نمٹنے کے اقدامات پر بریفنگ دی۔ اجلاس میں بتایا گیا کہ مشرق وسطیٰ میں جاری تنازع کی شدت بڑھنے کی صورت میں خام تیل کی قیمت 120 ڈالر فی بیرل تک جا سکتی ہے، جس کے اثرات ملکی معیشت اور توانائی کے شعبے پر مرتب ہو سکتے ہیں۔

وزیراعلیٰ سندھ مراد علی شاہ نے اجلاس کے دوران کہا کہ توانائی کے ذمہ دارانہ استعمال اور عوامی تعاون انتہائی ضروری ہے، اور حکومت کا مقصد قومی معیشت کے پہیے کو مسلسل حرکت میں رکھنا ہے۔ انہوں نے اجلاس میں زیر غور تجاویز کو کابینہ میں بھی پیش کرنے کا اعلان کیا۔

وفاقی وزیر خزانہ محمد اورنگزیب نے کہا کہ وفاقی حکومت عالمی توانائی منڈیوں کی مسلسل نگرانی کر رہی ہے اور قیمتوں کے ممکنہ مالی اثرات سے نمٹنے کے لیے متبادل منصوبے تیار کیے جا رہے ہیں۔ وزیر پیٹرولیم علی پرویز ملک نے اجلاس کو آگاہ کیا کہ ایندھن بچت کے اقدامات لازمی ہیں تاکہ موجودہ ذخائر زیادہ دیر تک برقرار رہ سکیں اور بتایا کہ کل تک پیٹرول کے تین جہاز پاکستان پہنچ جائیں گے۔

اجلاس میں پیٹرول پمپوں پر ذخیرہ اندوزی کے خدشات پر بھی غور کیا گیا اور وفاق اور صوبوں کے درمیان رابطہ بڑھانے کا فیصلہ کیا گیا۔ وزیر پیٹرولیم نے کہا کہ قطر کی جانب سے ممکنہ سپلائی متاثر ہونے کے خطرے کے پیش نظر، صوبوں کے ساتھ مشترکہ ڈیش بورڈ تیار کیا جا رہا ہے تاکہ ایندھن کے ذخائر پر مسلسل نگرانی کی جا سکے۔
مزید برآں، سعودی عرب، عمان اور متحدہ عرب امارات سے متبادل ایندھن سپلائی کے لیے رابطے جاری ہیں، اور دیگر ذرائع سے تیل کی فراہمی یقینی بنانے کی کوششیں بھی کی جا رہی ہیں۔ وزیر پیٹرولیم نے یہ بھی بتایا کہ آئی ایم ایف سے پیٹرولیم لیوی میں ریلیف کے لیے درخواست دینے کا امکان زیر غور ہے۔

اجلاس کے دوران وفاق اور صوبوں نے توانائی کی موجودہ صورتحال سے نمٹنے کے لیے قریبی رابطہ جاری رکھنے کا فیصلہ کیا تاکہ ملک میں ایندھن کی سپلائی مستحکم رہے اور ممکنہ بحران سے بچا جا سکے۔