پاکستان نے بھارتی آرمی چیف کے حالیہ الزامات کو سختی سے مسترد کرتے ہوئے کہا ہے کہ دہشت گردی کے الزامات سیاسی مقاصد کے لیے گھڑی گئی من گھڑت کہانی ہیں۔
ترجمان دفتر خارجہ طاہر حسین اندرابی نے ہفتہ وار پریس بریفنگ میں واضح کیا کہ پاکستان کی دہشت گردی کے خلاف قربانیاں عالمی سطح پر تسلیم شدہ ہیں اور بھارت کی بیان بازی پرانی، روایتی اور گمراہ کن ہے۔ اندرابی نے کہا کہ بھارت کی جانب سے پاکستان پر عائد الزامات نہ صرف بے بنیاد ہیں بلکہ خود بھارت کی ساکھ کو نقصان پہنچا رہے ہیں۔ انہوں نے کہا کہ بھارتی نیوی کے حاضر سروس افسر کلبھوشن یادیو کی گرفتاری کے شواہد ہمارے سامنے ہیں اور افغانستان سمیت خطے میں بھارت کے حمایت یافتہ دہشت گرد نیٹ ورکس کی نشاندہی بھی کی گئی ہے۔
ترجمان دفتر خارجہ نے بتایا کہ بھارت کی جانب سے ماورائے عدالت قتل اور ریاستی سرپرستی میں دہشت گردی کی متعدد مثالیں موجود ہیں۔ پاکستان نے بھارت کو مشورہ دیا ہے کہ وہ اشتعال انگیز بیانات سے گریز کرے کیونکہ بھارت میں بڑھتا ہوا انتہاپسندانہ اور مذہبی بنیادوں پر تشدد پورے خطے کے لیے خطرہ ہے۔
اندرابی نے مزید کہا کہ بھارت کو مہذب بین الاقوامی رویوں کی پابندی کرنی چاہیے اور غیر ذمہ دارانہ الزامات خطے میں کشیدگی بڑھانے کا سبب بن سکتے ہیں۔ انہوں نے واضح کیا کہ پاکستان نے ہمیشہ خطے میں امن اور استحکام کے لیے اپنا موقف پیش کیا ہے اور اس سلسلے میں عالمی برادری کو بھی آگاہ کیا گیا ہے۔
پاکستان کا موقف اس وقت سامنے آیا ہے جب بھارت کی اعلیٰ فوجی قیادت نے پاکستان پر دہشت گردی کی سرپرستی کے الزامات عائد کیے تھے، جنہیں پاکستان نے بلاجواز اور سیاسی مقاصد کے لیے گھڑوایا ہوا قرار دیا ہے۔
Leave feedback about this