سہیل آفریدی کی قیادت میں آج بڑی ریلی، کارکنوں کی آمد شروع ،سیاسی ہلچل کہاں دیکھنے کو ملے گی؟ سب پتا چل گیا

سہیل آفریدی کی قیادت میں آج کراچی سے حیدرآباد تک پی ٹی آئی کی بڑی اسٹریٹ موومنٹ ریلی، کارکنوں کی آمد شروع، حیدرآباد میں سیاسی ہلچل، تقریبات اور خطاب کا شیڈول مکمل ہو گیا

تفصیلات کے مطابق پاکستان تحریک انصاف (پی ٹی آئی) کی جانب سے آج کراچی سے حیدرآباد تک ایک بڑی اسٹریٹ موومنٹ ریلی کا انعقاد کیا گیا ہے، جس کی قیادت وزیراعلیٰ خیبرپختونخواسہیل آفریدی کریں گے۔ پارٹی ذرائع کے مطابق ریلی کا آغاز کراچی کے علاقے سہراب گوٹھ سے ہوگا، جہاں سے کارکنان کی آمد شروع ہو چکی ہے۔

ذرائع کا کہنا ہے کہ پی ٹی آئی نے تمام کارکنان کو ہدایت کی ہے کہ وہ سہراب گوٹھ پہنچیں، جہاں سے ریلی حیدرآباد کی جانب روانہ ہوگی۔ سہیل آفریدی آج حیدرآباد میں ایک مصروف دن گزاریں گے، جس کے دوران وہ مختلف سیاسی اور سماجی تقریبات میں شرکت کریں گے

شیڈول کے مطابق سہیل آفریدی حیدرآباد ہائی کورٹ بار سے خطاب کریں گے اور بعد ازاں ہم خیال جماعتوں کے رہنماؤں سے ملاقاتیں کریں گے۔ اس کے علاوہ وہ پی ٹی آئی وومن ونگ اور آئی ایس ایف کنونشن میں بھی شریک ہو کر خطاب کریں گے۔ ذرائع کے مطابق سہیل آفریدی حیدرآباد کے مختلف علاقوں کا دورہ بھی کریں گے تاکہ مقامی مسائل اور پارٹی کارکنان سے براہ راست رابطہ قائم کیا جا سکے۔

پارٹی کے مطابق، آج کی ریلی کے بعد سہیل آفریدی رات کے وقت کراچی واپس روانہ ہوں گے۔ پی ٹی آئی نے واضح کیا ہے کہ اتوار کے روز کراچی کے باغ جناح میں ایک اور بڑا سیاسی مظاہرہ کیا جائے گا، جس میں سہیل آفریدی سمیت پارٹی کے دیگر مرکزی اور مقامی رہنما کارکنان سے خطاب کریں گے۔

یہ ریلی پی ٹی آئی کی اسٹریٹ موومنٹ کے تحت ملک کے بڑے شہروں میں جاری سیاسی سرگرمیوں کا حصہ ہے اور اس کا مقصد پارٹی کی مقبولیت کو مستحکم کرنا اور عوامی رابطے بڑھانا بتایا جا رہا ہے۔