آٹے کے بعد چینی بھی مہنگائی کی لپیٹ میں، قیمتیں آسمان چھو رہی ہیں، فی کلو چینی میں کتنا اضافہ ہوا؟جانئے

ملک میں آٹے اور چینی کی قیمتیں آسمان پر پہنچ گئیں ایک ہفتے میں آٹا بیس روپے اور چینی دس روپے فی کلو تک مہنگی ہوگئی ۔

تفصیلات کے مطابق ملک بھر میں آٹے اور چینی کی قیمتوں میں ہوشربا اضافہ شہریوں کے لیے شدید مشکلات پیدا کر گیا ہے۔ حالانکہ پیٹرولیم مصنوعات کی قیمتوں میں کمی دیکھنے میں آئی، لیکن آٹے اور چینی کی قیمتیں ایک ہفتے کے دوران مزید بڑھ گئیں۔ذرائع کے مطابق، صرف ایک ہفتے میں ملک بھر میں آٹے کی قیمت میں 15 سے 20 روپے فی کلو جبکہ چینی کی قیمت میں 5 سے 10 روپے فی کلو تک اضافہ ریکارڈ کیا گیا ہے۔

اسلام آباد: 20 کلو آٹے کے تھیلے کی قیمت 2750 روپے تک پہنچ گئی ہے، جبکہ فی کلو چینی 152 روپے میں دستیاب ہے۔

لاہور: چکی کا آٹا ایک ہفتے میں 10 روپے فی کلو مہنگا ہو کر 170 روپے تک پہنچ گیا، فی من گندم کی قیمت 4400 سے بڑھ کر 4900 روپے ہو گئی ہے۔ 50 کلو چینی کے تھیلے کی قیمت میں 200 روپے اضافہ ہوا، اور فی کلو چینی 160 روپے میں فروخت ہو رہی ہے۔

کراچی: آٹا 140 سے 150 روپے فی کلو کے درمیان دستیاب ہے، جبکہ چینی 136 روپے فی کلو میں فروخت کی جا رہی ہے۔

پشاور: آٹے کے 20 کلو تھیلے کی قیمت میں 500 روپے اضافہ ہوا، جس کے بعد تھیلا 2750 روپے میں فروخت ہو رہا ہے۔ چینی کا سرکاری نرخ 160 روپے فی کلو مقرر ہے، تاہم مارکیٹ میں چینی 175 روپے فی کلو میں فروخت ہو رہی ہے۔

کوئٹہ: ایک ہفتے کے دوران آٹا 15 روپے اور چینی 5 روپے فی کلو مہنگی ہوئی ہے۔

ماہرین کا کہنا ہے کہ ملک میں آٹے اور چینی کی بڑھتی قیمتوں کی بڑی وجہ عالمی سطح پر گندم اور شوگر کی بڑھتی ہوئی قیمتیں اور ملکی سطح پر رسد و طلب میں توازن نہ ہونا ہے۔ شہریوں نے حکومتی اقدامات کا مطالبہ کرتے ہوئے کہا ہے کہ مہنگائی کی اس رفتار کو کنٹرول کیا جائے، ورنہ عام عوام کی روزمرہ زندگی مزید متاثر ہو گی۔
پیٹرولیم مصنوعات میں کمی کے باوجود روزمرہ کی اشیائے خورونوش میں اضافے نے عوام کی خریداری کی طاقت متاثر کر دی ہے، اور شہر بھر میں قیمتوں کی نگرانی کے لیے حکومتی اداروں پر بھی دباؤ بڑھ گیا ہے۔