شہری تیاری کرلیں !بارش اوربرفباری کی پیشگوئی، پی ڈی ایم اے کا الرٹ جاری

پرووینشل ڈیزاسٹر مینجمنٹ اتھارٹی (پی ڈی ایم اے) نے خبردار کیا ہے کہ خیبرپختونخوا کے مختلف علاقوں میں آج سے 5 دسمبر تک وقفے وقفے سے بارشیں متوقع ہیں جبکہ بالائی علاقوں میں برفباری کا امکان ہے۔
پی ڈی ایم اے نے صوبے کی تمام ضلعی انتظامیہ کو پیشگی اقدامات کرنے اور الرٹ رہنے کے لیے مراسلہ جاری کیا ہے۔ 4 اور 5 دسمبر کو دیر اپر و لوئر، چترال اپر و لوئر، سوات، کوہستان اپر و لوئر، کولائی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ اور مہمند کے اضلاع میں وقفے وقفے سے گرج چمک کے ساتھ بارش اور پہاڑوں پر برفباری کا امکان ہے۔
اسی دوران کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی و جنوبی وزیرستان، ٹانک اور ڈیرہ اسماعیل خان میں بھی بارش کے شدید امکانات ہیں۔
پی ڈی ایم اے نے خبردار کیا ہے کہ ایبٹ آباد، بٹگرام، بونیر، بالائی و زیریں چترال، بالائی و زیریں دیر، خیبر، بالائی و زیریں کوہستان، کولائی پالس، کرم، ملاکنڈ، مانسہرہ، مہمند، اورکزئی، شانگلہ، سوات، تورغر اور شمالی وزیرستان کے پہاڑی علاقوں میں سڑکوں پر پھسلن کا خطرہ ہے۔
مراسلے میں کہا گیا ہے کہ بارش کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچ سکتا ہے۔
پی ڈی ایم اے نے تمام ضلعی انتظامیہ کو ہدایت کی ہے کہ نکاسی آب کے نظام کی صفائی، مقامی آبادی، سیاحوں اور مسافروں کو بروقت آگاہی فراہم کریں، اور کاشتکاروں و مال مویشی پال حضرات کو فصلوں اور جانوروں کو محفوظ مقامات پر منتقل کرنے کی ہدایت دی ہے۔
پی ڈی ایم اے نے عوام سے اپیل کی ہے کہ خراب موسم کے دوران غیر ضروری سفر سے گریز کریں اور ہنگامی صورتحال کی صورت میںہیلپ لائن 1700 پر رابطہ کریں۔