خیبرپختونخوا حکومت نے سیاسی شخصیات کے نام پر فینسی نمبر پلیٹس متعارف کرانے کا فیصلہ کر لیا ہے، جس کے تحت صدر آصف علی زرداری، سابق وزیراعظم نواز شریف، بانی تحریک انصاف عمران خان اور دیگر اہم سیاسی شخصیات کے نام پر نمبر پلیٹس کی نیلامی ہوگی۔
صوبائی وزیر ایکسائز اینڈ ٹیکسیشن فخر جہاں کے مطابق، یونیک چوائس نمبر پلیٹس کی نیلامی 27 جنوری کو نشتر ہال میں ہوگی، جبکہ بولی کا آغاز 10 لاکھ روپے سے کیا جائے گا۔ وزیر ایکسائز نے بتایا کہ سب سے زیادہ بولی دینے والے کو اپنی من پسند سیاسی شخصیت کے نام کی نمبر پلیٹ دی جائے گی۔
انہوں نے مزید کہا کہ یہ نیلامی مرحلہ وار کی جائے گی، جس میں قومی قیادت، دیگر شخصیات، علاقوں اور اقوام کے نام پر نمبر پلیٹس کی بولی ہوگی۔ وزیر نے کہا کہ نیلامی کے عمل میں گاڑی مالکان کی بھرپور دلچسپی دیکھی جا رہی ہے اور یہ اقدام صوبائی خزانے کے لیے بھی اہم ریونیو کا ذریعہ ثابت ہوگا۔
شہری یونیک نمبر پلیٹس کے حصول کے لیے پہلے ہی دستک ایپ کے ذریعے درخواستیں جمع کرانا شروع کر چکے ہیں۔ محکمہ ایکسائز اینڈ ٹیکسیشن خیبرپختونخوا نے فینسی نمبر پلیٹس کی نیلامی سے متعلق باقاعدہ اشتہار بھی جاری کر دیا ہے۔ نیلامی میں حصہ لینے کے لیے شہری دستک ایپ کے ذریعے اپنی درخواستیں جمع کرا سکتے ہیں، جبکہ درخواستیں جمع کرانے کی آخری تاریخ 26 جنوری 2026 مقرر کی گئی ہے۔
یہ اقدام نہ صرف شہریوں کے لیے منفرد موقع فراہم کرے گا بلکہ صوبے کے خزانے کے لیے بھی ریونیو میں اضافہ کرے گا، اور عوامی دلچسپی کے نئے امکانات پیدا کرے گا۔
Leave feedback about this