پاکستان کرکٹ بورڈ (پی سی بی) نے ٹی ٹوئنٹی ورلڈ کپ 2026 کے لیے اپنے ابتدائی اسکواڈ کے نام آئی سی سی کو بھجوا دیے ہیں۔ ابتدائی اسکواڈ میں شامل کھلاڑیوں کی فہرست سامنے آتے ہی شائقین کرکٹ میں جوش و خروش پیدا ہو گیا ہے۔
ذرائع کے مطابق، ابتدائی ناموں کی ڈیڈ لائن کے مطابق پی سی بی نے تمام کھلاڑیوں کے نام بروقت آئی سی سی کو بھیج دیے ہیں۔ پاکستان کرکٹ بورڈ 31 جنوری 2026 تک بغیر آئی سی سی کی اجازت کے اسکواڈ میں تبدیلی کر سکتا ہے، تاہم اس کے بعد کسی بھی تبدیلی کے لیے آئی سی سی کی ٹیکنیکل کمیٹی کی اجازت ضروری ہو گی۔
ابتدائی اسکواڈ میں 15 کھلاڑیوں کے ساتھ ساتھ ریزرو کھلاڑیوں کے نام بھی شامل کیے گئے ہیں۔ پی سی بی کی منصوبہ بندی ہے کہ سری لنکا کے خلاف سیریز کے بعد اور آسٹریلیا کے ساتھ شیڈول سیریز کے تناظر میں ورلڈ کپ اسکواڈ کا حتمی اعلان کیا جائے گا۔
ابتدائی اسکواڈ میں شامل کھلاڑیوں میں بابر اعظم، شاہین آفریدی اور حارث رؤف کے نام نمایاں ہیں۔ سری لنکا کے دورے کے لیے بھی اسکواڈ میں کپتان سلمان علی آغا کے ساتھ عبدالصمد، ابرار احمد، فہیم اشرف، فخر زمان، خواجہ محمد نافع اور محمد نواز کو شامل کیا گیا ہے۔
اس کے علاوہ محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق بھی اسکواڈ میں جگہ بنانے میں کامیاب رہے ہیں۔
پی سی بی کا کہنا ہے کہ ابتدائی اسکواڈ کے نام بھیجنے کے بعد اب ٹیم کی تیاری اور فائنل اسکواڈ کی تشکیل پر توجہ دی جائے گی تاکہ پاکستان ورلڈ کپ 2026 میں بھرپور کارکردگی کا مظاہرہ کر سکے۔
Leave feedback about this