شہدا نے قوم کو دہشتگردی اور مذہبی انتہا پسندی کیخلاف یکجا ہونے کی راہ دکھائی، رانا ثنا اللہ

اسلام آباد: وزیر داخلہ رانا ثنا اللہ خان نے کہا ہے کہ سانحہ آرمی پبلک اسکول (اے پی ایس)ملکی تاریخ کا ایک غمناک ترین واقعہ ہے۔ سفاک اور درندہ صفت دہشت گردوں نے معصوم اور کمسن بچوں کو حملہ کر کے شہید کردیا۔ 8 برس گزرنے کے باوجود یہ زخم آج بھی تازہ ہے۔ ناقابل فراموش ہے۔ شہدا نے پوری قوم کو دہشت گردی اور مذہبی انتہا پسندی کے خلاف یکجا ہونے کی راہ دکھائی۔ان خیالات کااظہار رانا ثنا اللہ خان نے سانحہ اے پی ایس کی آٹھویں برسی کے موقع پر جمعہ کے روز ٹوئٹر پر جاری اپنے بیان میں کیا۔ رانا ثنا اللہ خان کا کہنا تھا کہ قوم نے مل کر ملک سے دہشت گردی کو شکست دی۔ 16 دسمبر کا دن شہدا کی عظیم قربانیوں کی ہمیشہ یاد دلاتا رہے گا۔ آج کے دن ہم بچوں کے والدین اورانکے بہادراساتذہ کو سلام، خراج تحسین پیش کرتے ہیں۔ دعا ہے کہ اللہ تعالی شہدا کے درجات بلند کرے اور ان کے اہلخانہ کو صبرِ جمیل عطا کرے۔