جڑواں شہروں میں موسلادھار بارش، پمز اسٹاف کو ہائی الرٹ رہنے کی ہدایت

پمز ہسپتال کے ایگزیکٹو ڈائریکٹر نے جڑواں شہروں میں موسلادھار بارش کے باعث ڈاکٹرز اور پیرا میڈیکل اسٹاف کو ہائی الرٹ رہنے کی ہدایت کی ہے ۔پمز ہسپتال کے ترجمان ڈاکٹر مبشر ڈاہا نے کہا ہے کہ پشاور روڈ پر گولڑہ موڑ کے قریب دیوار گرنے سے جاں بحق ہونیوالے مزدوروں میں سے 11 کی لاشیں پمز لائی گئی ہیں ۔ڈاکٹر مبشر ڈاہا کا کہنا ہے کہ مرنیوالوں کی عمریں 19 سے 36 سال کے درمیان ہیں ۔دیوار گرنے کے باعث پمز میں 6 زخمی بھی لائے گئے ہیں ۔ زخمی ہونے والے افراد خطرے سے باہر ہیں ۔زخمی ہونیوالوں میں ایک مزدور کو ابتدائی طبی امداد کے بعد ڈسچارج کردیا گیا ہے ۔پمز انتظامیہ جڑواں شہروں میں شدید بارش کے بعد مکمل الرٹ ہے ہسپتال کا عملہ کسی بھی ناگہانی آفت سے نمٹنے کیلئے متحرک ہے۔