سابق کپتان وسیم اکرم کا لاپتا پالتو کتا ’ڈیوک‘ بالآخر مل گیا، جس پر خوشی کا اظہار کرتے ہوئے ان کی اہلیہ شینیرا اکرم نے اطلاع دینے والے 2 افراد کو 250,000 روپے کا نقد انعام دینے کا اعلان کیا ہے۔
واضح رہے کہ ویسیم اکرم اور شینیرا اکرم کا 5 ماہ کا سیاہ رنگ کا جرمن شیفرڈ نسل کا کتا ’ڈیوک‘ کراچی کے علاقے ڈی ایچ اے فیز 8 سے اتوار کے روز لاپتا ہو گیا تھا۔
جوڑے نے اپنے سرکاری انسٹاگرام اکاؤنٹس کے ذریعے عوام سے مدد کی اپیل کی تھی اور ’ڈیوک‘ کی بحفاظت واپسی پر 250,000 روپے کے انعام کا اعلان کیا تھا۔
اس حوالے سے متعلقہ تھانے میں باقاعدہ گمشدگی کی رپورٹ بھی درج کرائی گئی تھی، جس کے بعد مقامی پولیس نے بھی ’ڈیوک‘ کی تلاش میں کارروائی شروع کر دی تھی۔
شینیرا اکرم نے اپنے پیغام میں تشویش کا اظہار کرتے ہوئے کہا تھا کہ کم عمر کتا خوفزدہ اور پریشان ہو سکتا ہے۔ انہوں نے ڈی ایچ اے فیز 8 اور گردونواح کے رہائشیوں سے درخواست کی تھی کہ وہ اپنے گھروں کے قریب پارکس، گلیوں، چھتوں اور گیراجز میں ’ڈیوک‘ کو تلاش کریں۔
عوامی تعاون اور پولیس کی مدد سے ’ڈیوک‘ بالآخر بحفاظت مل گیا، جس پر ویسیم اکرم اور ان کی اہلیہ نے شکرگزاری کا اظہار کیا اور مدد کرنے والے تمام افراد بالخصوص انعام کے حقدار دونوں شہریوں کا خصوصی شکریہ ادا کیا۔