پیٹرول کی قیمت میں کمی کا امکان، عوام کو محدود ریلیف ملنے کی توقع

ملک بھر میں پیٹرول استعمال کرنے والے شہریوں کے لیے آئندہ دنوں میں کچھ ریلیف کی امید پیدا ہو گئی ہے، کیونکہ عالمی منڈی میں خام تیل کی قیمتوں میں استحکام اور درآمدی اخراجات میں ممکنہ کمی کے باعث پیٹرول کی قیمت میں معمولی کمی کا امکان ظاہر کیا جا رہا ہے۔

 اگر بین الاقوامی سطح پر خام تیل کی قیمتیں موجودہ سطح پر برقرار رہتی ہیں اور حکومت کی جانب سے پیٹرولیم محصولات، لیوی یا دیگر ٹیکسوں میں اضافہ نہیں کیا جاتا تو آئندہ قیمتوں کے جائزے میں پیٹرول کی قیمت تین سے چار روپے کم کی جا سکتی ہے۔

ماہرین کا کہنا ہے کہ گزشتہ چند ہفتوں کے دوران عالمی تیل منڈی میں غیر یقینی صورتحال کے بعد قیمتیں نسبتاً متوازن ہونا شروع ہو گئی ہیں، جس کے اثرات مقامی سطح پر بھی دیکھے جا سکتے ہیں۔

توانائی شعبے کے تجزیہ کاروں کے مطابق درآمدی پریمیم میں کمی اور عالمی منڈی میں خام تیل کی قیمتوں میں محدود استحکام کے باعث پیٹرول کی فی لیٹر قیمت میں تقریباً 2 سے 4 روپے تک کمی کی گنجائش پیدا ہوئی ہے۔

تجزیہ کاروں نے خبردار کیا ہے کہ حتمی فیصلہ حکومتی پالیسی، محصولات کی شرح اور دیگر مالیاتی عوامل کو مدنظر رکھتے ہوئے کیا جائے گا، اس لیے ابھی کسی حتمی کمی کا اعلان نہیں کیا جا سکتا۔

تیل کی قیمتوں کے تعین میں صرف عالمی نرخ ہی نہیں بلکہ زرِ مبادلہ کی صورتحال، درآمدی لاگت، نقل و حمل کے اخراجات اور حکومتی محصولات بھی اہم کردار ادا کرتے ہیں، اگر ان عوامل میں کوئی بڑی تبدیلی آتی ہے تو متوقع کمی کی شرح بھی متاثر ہو سکتی ہے۔

یاد رہے کہ ملک میں اس وقت پیٹرول کی قیمت 377 روپے 78 پیسے فی لیٹر ہے، جو 6 جون کو ہونے والے حالیہ جائزے کے بعد مقرر کی گئی تھی،عوام کی نظریں اب آئندہ سرکاری اعلان پر مرکوز ہیں، جس میں یہ واضح ہوگا کہ عالمی منڈی کے رجحانات سے مقامی صارفین کو کس حد تک فائدہ پہنچتا ہے۔