پاکستان نے اپنی سفارتی تاریخ میں ایک اہم سنگِ میل عبور کرتے ہوئے ایک بڑی پیش رفت ممکن بنا دی ہے۔ بھرپور، مخلصانہ اور پیشہ ورانہ کوششوں کے نتیجے میں پاکستان نے نہ صرف جنگ بندی کی راہ ہموار کی بلکہ دہائیوں بعد فریقین کو ایک میز پر بھی بٹھا دیا۔
نائب وزیرِاعظم و وزیرِ خارجہ کی قیادت میں ہونے والی اس سفارتی مہم میں 31 گھنٹے تک مسلسل مذاکرات اور متعدد نشستیں شامل رہیں۔ اس دوران پاکستان کے وزیرِ خارجہ کے ثالثی کردار کو دونوں فریقین نے تسلیم کیا۔
اگرچہ یہ ایک پیچیدہ اور طویل تنازع ہے جس میں مختلف اختلافات اور بیرونی عوامل بھی شامل ہیں، تاہم اس عمل کے دوران کئی مثبت پیش رفت سامنے آئی ہے۔ پاکستان نے واضح کیا ہے کہ جو کچھ حاصل ہوا یا نہ ہو سکا، وہ فریقین کے باہمی معاملات اور اندرونی دباؤ کا نتیجہ ہے۔
پاکستان نے عالمی اور علاقائی امن کے لیے ایک غیر معمولی کردار ادا کیا ہے، جسے بین الاقوامی سطح پر بھی سراہا جا رہا ہے۔ امریکی نائب صدر جے ڈی وینس کے بیان میں بھی اس عمل کے دوران امید اور پیش رفت کے اشارے ملے ہیں۔
دونوں فریقین اب ایک دوسرے کے مؤقف کو بہتر طور پر سمجھ چکے ہیں، اور آگے کا راستہ اسی بنیاد پر طے ہونے کی توقع ہے۔ پاکستان نے واضح کیا ہے کہ مذاکرات کی تفصیلات ظاہر کرنا اس کا دائرہ کار نہیں، کیونکہ اس کا کردار صرف ثالثی تک محدود تھا۔