محکمہ موسمیات نے دن بھر وقفے وقفے کے ساتھ بارش کی پیش گوئی کی ہے، جس کے بعد لاہور سمیت پنجاب کے مختلف شہروں میں موسم خوشگوار ہوگیا ہے۔ صوبائی دارالحکومت لاہور میں علی الصبح بادل جم کر برسے، اور شہر کے مختلف علاقوں جیسے شملہ پہاڑی، مال روڈ، ڈیوس روڈ، لکشمی چوک، سول سیکرٹریٹ، ساندہ روڈ اور چوبرجی میں موسلادھار بارش ہوئی۔ بارش کے بعد صبح سویرے لاہور میں ٹھنڈک محسوس کی جا رہی ہے۔
محکمہ موسمیات کے مطابق، پنجاب میں بارشوں کے باعث موسم خوشگوار ہو چکا ہے، لیکن متعدد فیڈرز ٹرپ ہونے کے سبب بجلی کی فراہمی معطل ہو گئی ہے۔
خیبر پختونخوا کے زیادہ تر اضلاع میں آج رات سے 16 مارچ کی صبح تک تیز ہواؤں اور گرج چمک کے ساتھ بارش کی پیش گوئی کی گئی ہے۔ اس سلسلے میں صوبائی ڈیزاسٹر مینجمنٹ اتھارٹی (پی ڈی ایم اے) نے تمام ضلعی انتظامیہ کو الرٹ جاری کر دیا ہے۔
پی ڈی ایم اے کی پیش گوئی کے مطابق، صوبے کے بالائی اضلاع جیسے چترال، دیر، سوات، بونیر، اور ملاکنڈ میں بارش اور پہاڑوں پر برفباری کا امکان ہے۔ اسی طرح، کوہستان، شانگلہ، بٹگرام اور تورغر میں موسلادھار بارش کے ساتھ لینڈ سلائیڈنگ کا خطرہ بھی موجود ہے۔
پی ڈی ایم اے نے شہریوں کو ہدایت کی ہے کہ وہ پہاڑی علاقوں، لینڈ سلائیڈنگ کے خطرناک مقامات، کمزور عمارتوں اور بجلی کے کھمبوں سے دور رہیں اور غیر ضروری سفر سے گریز کریں۔ ایمرجنسی خدمات، ریسکیو ٹیمیں اور مشینری تمام اضلاع میں الرٹ پر ہیں تاکہ کسی بھی ناخوشگوار صورتحال سے نمٹنے کے لیے فوری کارروائی کی جا سکے۔
پی ڈی ایم اے کے ترجمان نے کہا ہے کہ ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع ہیلپ لائن 1700 پر دے سکتے ہیں۔