موٹر سائیکلوں پر ایم ٹیگ لازمی قرار،سخت ایکشن کا انتباہ جاری

اسلام آباد: وفاقی دارالحکومت اسلام آباد کی ضلعی انتظامیہ نے شہر میں سیکیورٹی سخت کرنے اور جرائم کی روک تھام کے لیے موٹر سائیکلوں پر ایم ٹیگز کو لازمی قرار دینے کا فیصلہ کیا ہے جس کے تحت شہری چند منٹوں میں اپنی موٹر سائیکلوں پر جدید شناختی ٹیگ لگا سکیں گے۔

ضلعی انتظامیہ کے مطابق موٹر سائیکل ایم ٹیگ سروس شہر بھر کے تیرہ مخصوص مراکز پر شروع کی گئی ہے جہاں شہری اپنی موٹرسائیکل، ملکیتی دستاویزات اور شناختی کارڈ کے ساتھ پہنچ کر صرف پانچ منٹ میں ٹیگ حاصل کر سکتے ہیں۔ اس سسٹم کا مقصد موٹر سائیکلوں کی درست شناخت، چوری شدہ گاڑیوں کی فوری شناخت اور جرائم پیشہ عناصر کی نقل و حرکت پر نظر رکھنا ہے۔

سماجی رابطے کے پلیٹ فارم ایکس پر جاری پیغام میں ڈپٹی کمشنر اسلام آباد نے شہریوں کو ہدایت کی کہ وہ جلد از جلد اپنی موٹر سائیکلوں کو رجسٹر کریں اور ایم ٹیگ حاصل کریں تاکہ مستقبل میں کسی بھی قانونی پیچیدگی سے بچا جا سکے۔ ایم ٹیگ کے بغیر موٹرسائیکل چلانے والوں کے خلاف قانون کے مطابق کارروائی کی جائے گی جس میں جرمانے اور ممکنہ طور پر گاڑی کی ضبطی بھی شامل ہے۔

انتظامیہ کے مطابق یہ اقدام جدید شہری حفاظتی نظام کا حصہ ہے جس سے مشکوک گاڑیوں کی نگرانی، ٹریفک نظم و ضبط اور جرائم کی روک تھام میں مدد ملے گی۔ اس طرح کے ڈیجیٹل ٹیگنگ سسٹم پہلے ہی بڑے شہروں میں موثر ثابت ہو چکے ہیں اور دارالحکومت میں اس کے نفاذ سے شہری تحفظ کو مزید تقویت ملے گی۔

اس فیصلے پر شہریوں نے ملے جلے ردعمل کا اظہار کیا ہے۔ کچھ نے اسے سیکیورٹی کے لیے ایک مثبت قدم قرار دیا ہے جب کہ کچھ نے سہولتی مراکز کی تعداد میں اضافے اور آگاہی مہم چلانے کا مطالبہ کیا ہے تاکہ عوام کو طریقہ کار سے پوری طرح آگاہ کیا جاسکے۔

ضلعی انتظامیہ نے عوام سے اپیل کی ہے کہ وہ قانون کی پاسداری کرتے ہوئے اس اقدام میں تعاون کریں اور مقررہ مراکز سے بروقت ایم ٹیگز حاصل کریں تاکہ شہر میں امن و امان برقرار رکھنے اور جرائم کے خاتمے میں اجتماعی کردار ادا کر سکیں۔