رمضان المبارک کا آغاز، وفاقی دارالحکومت میں رمضان بازار سج گئے

اسلام آباد: رمضان المبارک کی آمد کے ساتھ ہی وفاقی دارالحکومت اسلام آباد میں رمضان بازار سج گئے ہیں جہاں خریداروں کا رش دیکھا جارہا ہے۔ شہریوں کو معیاری چکن، گروسری، تازہ سبزیاں اور پھل سرکاری نرخوں پر فراہم کیے جا رہے ہیں۔

ڈپٹی کمشنر اسلام آباد عرفان میمن کے مطابق ماہ مقدس میں عوام کو ریلیف فراہم کرنے کے لیے شہر بھر میں مجموعی طور پر 7 رمضان بازار لگائے گئے ہیں۔ ہر رمضان بازار کے انتظامات کی ذمہ داری متعلقہ اسسٹنٹ کمشنر کو سونپی گئی ہے جبکہ سٹاک کی دستیابی اور سرکاری نرخوں پر عمل درآمد بھی اسسٹنٹ کمشنر کی ذمہ داری ہو گی۔

ڈی سی اسلام آباد کا کہنا ہے کہ پرائس کنٹرول مجسٹریٹس ہر بازار میں ہر وقت موجود رہیں گے اور شہری کسی بھی قسم کی شکایت پر فوری طور پر متعلقہ پرائس کنٹرول مجسٹریٹ کے نوٹس میں لاسکتے ہیں۔

عرفان میمن کے مطابق خریداری کے عمل کو مزید سہل بنانے کے لیے تمام بازاروں میں کیش لیس سسٹم کے حوالے سے بھی اقدامات کیے گئے ہیں۔ اس کے علاوہ پارکنگ، سیکورٹی اور صفائی کے انتظامات کو بھی یقینی بنایا گیا ہے۔

ڈی سی اسلام آباد نے واضح کیا کہ شہریوں کو کھانے پینے کی اشیاء پر حکومتی ریلیف ہر صورت فراہم کیا جائے گا اور اس سلسلے میں کسی قسم کی کوتاہی برداشت نہیں کی جائے گی۔