اسلام آباد: بین الاقوامی مالیاتی فنڈ (آئی ایم ایف) نے کہا ہے کہ وہ بجلی کی قیمتوں میں مجوزہ تبدیلیوں پر پاکستانی حکام سے مشاورت کر رہا ہے تاہم اس بات کو یقینی بنائے گا کہ کسی بھی تبدیلی کا بوجھ متوسط اور کم آمدنی والے طبقوں پر نہ پڑے۔
برطانوی خبر رساں ادارے کے مطابق آئی ایم ایف نے کہا کہ جاری مذاکرات کا جائزہ لیا جا رہا ہے کہ آیا مجوزہ ٹیرف اصلاحات پروگرام کے تحت کیے گئے وعدوں سے مطابقت رکھتی ہیں یا نہیں اور میکرو اکنامک استحکام بالخصوص افراط زر پر ان کے ممکنہ اثرات کا بھی جائزہ لیا جا رہا ہے۔
پاکستانی حکومت نے بجلی کی قیمتوں کے ڈھانچے میں بڑی تبدیلیوں کا اعلان کیا ہے۔ ماہرین کے مطابق ان اقدامات سے جہاں مہنگائی میں اضافہ ہوسکتا ہے وہیں صنعتی شعبے کو کچھ ریلیف ملنے کا امکان ہے۔ یہ پیشرفت اس وقت ہوئی جب پاکستان 7 بلین ڈالر کی توسیعی فنڈ سہولت (EFF) کے تحت شرائط کو پورا کرنے کی کوشش کر رہا ہے اور IMF کا اگلا جائزہ قریب ہے۔
توسیعی فنڈ سہولت دراصل آئی ایم ایف کا ایک طویل المدتی قرضہ پروگرام ہے، جس کا مقصد رکن ممالک کو سنگین اقتصادی کمزوریوں اور ادائیگیوں کے درمیانی مدت کے توازن کے مسائل سے نمٹنے میں مدد فراہم کرنا ہے۔
رپورٹ کے مطابق، بجلی کا پاکستان کے کنزیومر پرائس انڈیکس میں ایک اہم وزن ہے، اس لیے ٹیرف میں کوئی بھی تبدیلی سیاسی اور معاشی طور پر ایک حساس مسئلہ بن جاتا ہے، خاص طور پر ایسے وقت میں جب مہنگائی، اگرچہ 2023 میں اپنے عروج سے تقریباً 40 فیصد کم ہو گئی ہے، عوام کے لیے اب بھی ایک بڑا چیلنج ہے۔
پاکستان کا پاور سیکٹر طویل عرصے سے گردشی قرضے کے مسئلے سے دوچار ہے، جو واجبات کی عدم ادائیگی اور سبسڈی کے بوجھ سے پیدا ہوتا ہے اور بجلی پیدا کرنے والی کمپنیوں، تقسیم کار کمپنیوں اور حکومت کے درمیان جمع ہوتا ہے۔ 2023 سے جاری آئی ایم ایف کی حمایت یافتہ اصلاحات کے تحت اس مسئلے کو حل کرنے کے لیے ٹیرف میں کئی بار اضافہ کیا گیا ہے۔
آئی ایم ایف کا مزید کہنا ہے کہ بہتر وصولیوں اور لائن لاسز میں کمی نے پاور سیکٹر کے سرکلر ڈیٹ کو پروگرام کے اہداف کے اندر رکھنے میں مدد کی ہے۔