لاہور: سینئر سیاستدان اور سابق رکن صوبائی اسمبلی زعیم قادری عارضہ قلب کے باعث انتقال کرگئے جس سے سیاسی حلقوں اور کارکنوں میں گہرے رنج و غم کی لہر دوڑ گئی ہے۔
خاندانی ذرائع کے مطابق وہ گزشتہ تین روز سے ایک نجی ہسپتال میں دل کے عارضے میں زیر علاج تھے تاہم ان کی طبیعت بگڑ گئی اور وہ جانبر نہ ہو سکے۔
مرحوم کی نماز جنازہ آج شام بعد نماز مغرب لارنس روڈ لاہور میں ادا کی جائے گی جس میں بڑی تعداد میں سیاسی، سماجی اور عوامی شخصیات کی شرکت متوقع ہے۔
ان کے انتقال کی خبر سامنے آتے ہی مختلف سیاسی رہنماؤں اور کارکنوں کی جانب سے تعزیتی پیغامات کا سلسلہ شروع ہو گیا ہے۔
واضح رہے کہ زعیم قادری کا شمار ملک کے فعال اور اوٹ پٹانگ سیاستدانوں میں ہوتا تھا۔ وہ پاکستان مسلم لیگ (ن) سے وابستہ رہے اور پنجاب اسمبلی کے رکن کی حیثیت سے عوامی مسائل کو بھرپور طریقے سے اجاگر کیا۔ ان کی تقاریر، سیاسی بصیرت اور عوامی رابطہ مہم نے انہیں لوگوں میں ایک خاص مقام حاصل کیا۔
سیاسی تجزیہ کاروں کا کہنا ہے کہ زعیم قادری نہ صرف ایک فعال سیاست دان تھے بلکہ ایک اصول پسند اور بے باک آواز کے طور پر بھی جانے جاتے تھے۔
مرحوم کے اہل خانہ، دوستوں اور چاہنے والوں نے عوام سے ان کی مغفرت اور بلندی درجات کے لیے دعا کی اپیل کی ہے۔