الیکشن کمیشن کا پیغام واضح، ضابطہ اخلاق کی خلاف ورزی کرنیوالے سہیل آفریدی سمیت تمام رہنماؤں کے خلاف کارروائی ہوگی
تفصیلات کے مطابق سہیل آفریدی دوبارہ الیکشن کمیشن میں طلب، انتخابی ضابطہ اخلاق کی خلاف ورزی کا کیس زیر سماعت الیکشن کمیشن آف پاکستان نے خیبر پختونخوا کے وزیر اعلیٰ سہیل آفریدی کو ضمنی انتخابات میں انتخابی ضابطہ اخلاق کی خلاف ورزی کے الزام میں دوبارہ طلب کر لیا ہے۔ کمیٹی کی جانب سے سماعت 10 دسمبر کو ہوگی۔
ذرائع کے مطابق الیکشن کمیشن نے سابق اپوزیشن لیڈر عمر ایوب کی اہلیہ کو بھی اس کیس میں نوٹس جاری کر دیا ہے۔ الیکشن کمیشن ضابطہ اخلاق کی خلاف ورزی کے تمام مقدمات پر یکساں طور پر کارروائی کر رہا ہے تاکہ شفافیت کو یقینی بنایا جا سکے۔
علاوہ ازیں، وزیراعظم کے معاون خصوصی حذیفہ رحمان کے خلاف این اے 185 ڈیرہ غازی خان میں ضابطہ اخلاق کی خلاف ورزی کے کیس کی سماعت بھی اسی دن ہوگی۔ اس کے علاوہ مسلم لیگ ن کے رہنما مرتضیٰ عباسی کے خلاف بھی ضابطہ اخلاق کی خلاف ورزی کے کیس پر کارروائی 10 دسمبر کو متوقع ہے۔
الیکشن کمیشن کے حکام کا کہنا ہے کہ ضابطہ اخلاق کی خلاف ورزی کے تمام مقدمات پر سختی سے عملدرآمد کیا جائے گا اور کوئی بھی امیدوار یا سیاسی رہنما قانون سے بالاتر نہیں ہوگا۔