پیٹرول کتنے روپے سستا ہونے والا ہے؟ پاکستانی عوام کیلئے خوشخبری آگئی

پاکستانی عوام کے لیے خوشخبری، پیٹرولیم مصنوعات کی قیمتوں میں کمی کا امکان، پٹرول 4.59 روپے فی لٹر تک سستا ہو سکتا ہے۔

پاکستانی عوام کے لیے پیٹرولیم مصنوعات کی قیمتوں میں کمی کی اہم خبر سامنے آ گئی ہے۔ ذرائع کے مطابق 16 جنوری سے پیٹرولیم مصنوعات کی قیمتوں میں کمی متوقع ہے، جو نئے سال کے آغاز میں صارفین کے لیے بڑا ریلیف ثابت ہوگی۔

حکام نے بتایا کہ پٹرول 4.59 روپے فی لٹر تک سستا ہونے کا امکان ہے، جبکہ ڈیزل 2.70 روپے فی لٹر تک کم ہو سکتا ہے۔ اس کے علاوہ مٹی کا تیل 1.82 روپے اور لائٹ ڈیزل 2.08 روپے فی لٹر تک سستا ہونے کی توقع ہے۔

ذرائع نے مزید بتایا کہ پیٹرولیم مصنوعات کی قیمتوں میں کمی کی ابتدائی ورکنگ تیار کر لی گئی ہے اور اوگرا 15 جنوری کو پٹرولیم ڈویژن کو ورکنگ ارسال کرے گا۔ وزیراعظم کی منظوری کے بعد پٹرولیم ڈویژن نئی قیمتوں کا اعلان کرے گا، جو 15 روز کے لیے نافذ العمل ہوں گی۔

یاد رہے کہ یکم جنوری 2026 کو بھی پیٹرول کی قیمت میں 10.28 روپے فی لٹر اور ہائی اسپیڈ ڈیزل میں 8.57 روپے فی لٹر کمی کی گئی تھی۔ حکام کا کہنا ہے کہ قیمتوں میں کمی کی وجہ بین الاقوامی تیل کی مارکیٹ میں کمی، کم کسٹمز ڈیوٹی اور کرنسی ریٹ میں تبدیلیاں ہیں۔

بین الاقوامی مارکیٹ میں پٹرول کی قیمت 11 جنوری کو 2.74 ڈالر فی بیرل کم ہو کر 66.54 ڈالر فی بیرل تک پہنچ گئی، جس کا اثر مقامی مارکیٹ پر بھی مرتب ہوا۔

یہ کمی پاکستانی عوام کے لیے مسلسل چوتھی مرتبہ ریلیف فراہم کرے گی اور صارفین کے بجٹ پر مثبت اثر ڈالے گی۔