حماد اظہر نے انتخابات سے دستبردار ی کا اعلان کردیا

تحریک انصاف کے رہنما حماد اظہر نے انتخابات سے دستبرداری کا اعلان کر دیا ہے۔سپریم کورٹ میں حماد اظہر کے کاغذات نامزدگی مسترد ہونے سے متعلق کیس کی سماعت کے دوران انہوں نے سپریم کورٹ سے اپنی اپیل واپس لے لی۔عدالت میں معاون وکیل نے کہا کہ حماد اظہر اپیل کی پیروی نہیں کرنا چاہتے۔جسٹس منصور علی شاہ نے سوال کیا کہ ہائی کورٹ نے اپنے فیصلے میں 62 ون ایف کا حوالہ کیوں دیا؟ سپریم کورٹ کے فیصلے سے واضح ہے کہ آرٹیکل 62 ون ایف خود بخود لاگو نہیں ہوتا۔وکیل آفتاب یاسر نے کہا کہ اشتہارات کی اہلیت سے متعلق آپ کا فیصلہ بھی آ چکا ہے۔جسٹس منصور علی شاہ نے کہا کہ اپیل واپس لینے سے حماد اظہر کو فیصلے سے کوئی فائدہ نہیں ہوگا۔جسٹس جمال خان مندوخیل نے کہا کہ لگتا ہے حماد اظہر سرنڈر نہیں کرنا چاہتے۔معاون وکیل آفتاب عالم یاسر نے کہا کہ سرنڈر کرنے میں کوئی حرج نہیں۔واضح رہے کہ پی ٹی آئی رہنما حماد اظہر این اے 129 سے آزاد امیدوار تھے۔