جاسوسی کے خدشہ کے پیش نظر عمران خان کی رہائشگاہ کا سرچ آپریشن

اسلام آباد:جاسوسی کے آلات نصب کرنے کے خدشے کے پیش نظر سپیشل برانچ کے افسران نے پاکستان تحریک انصاف کی زمان پارک رہائش گاہ میں سرچ آپریشن کیا۔ہمارے نمائندے کے مطابق حالیہ آڈیو لیکس کے بعد عمران خان کو زمان پارک گھر کی جاسوسی کا خدشہ تھا جس کے تحت سپیشل برانچ کے افسران نے جدید آلات کی مدد سے گھر کو چیک کیا۔جاسوسی کے آلات کا معلوم کرنے کیلئے سپیشل پرانچ کے خصوصی ماہرین کی ٹیم پہنچی جنہوں نے جدید آلات کی مدد سے عمران خان کے گھر کا ہر ایک حصہ چیک کیا اور مختلف حصوں کا خصوصی معائنہ بھی کیا۔بعد ازاں سپیشل برانچ کی ٹیم نے گھر کو کلیئر قرار دے دیا۔واضح رہے کہ عمران خان اور ان کی اہلیہ کی اب تک متعدد آڈیو لیکس سامنے آچکی ہیں جن کی پی ٹی آئی نے تردید نہیں کی البتہ اسے سیکریٹ ایکٹ کی خلاف ورزی قرار دیا ہے۔