یونان کشتی حادثہ: دفتر خارجہ کی ایک پاکستانی جاں بحق، 47 کے بچنے کی تصدیق

اسلام آباد:ترجمان دفتر خارجہ ممتاز زہرا بلوچ کے مطابق کشتی الٹنے کے واقعہ میں بچ جانے والوں میں 47 پاکستانی بھی شامل ہیں، جاں بحق ہونے والوں میں ایک پاکستانی کی بھی تصدیق ہوئی ہے، حادثے میں لاپتہ افراد کی تلاش کیلئے ریسکیو آپریشن جاری ہے۔ اس وقت جاں بحق یا لاپتہ پاکستانی شہریوں کی تعداد کی تصدیق کرنے سے قاصر ہیں۔
پاکستانی سفارت خانہ ہیلینک کوسٹ گارڈ اور چانیا کے کوسٹ گارڈ کے ساتھ رابطے میں ہے، کوسٹ گارڈ براہ راست تلاش اور بچا آپریشن سے نمٹ رہے ہیں۔ سفارتخانے کے اہلکار بازیاب کرائے گئے پاکستانیوں سے ملنے کریٹ پہنچ گئے ہیں، سفارت خانے کے اہلکار انہیں ہر قسم کی مدد فراہم کرنے کے لئے کریٹ میں موجود ہیں۔
یونان کے جنوبی جزیرے کے قریب کشتی الٹنے سے ایک پاکستانی سمیت 5 افراد جاں بحق ہوگئے ہیں، واقعہ میں بچ جانے والوں میں 47 پاکستانی شامل ہیں، لاپتہ افراد کی تلاش کیلئے ریسکیو آپریشن جاری ہے۔