پاکستان اور ترکیہ کو مختلف شعبوں میں تعاون بڑھانے کی ضرورت :وزیر اطلاعات

اسلام آباد:وفاقی وزیر اطلاعات ونشریات عطا ء اللہ تارڑ نے اسلام آباد میں پاک ترکیہ فرینڈ شپ ریڈیو میوزیم کی افتتاحی تقریب سے خطاب کرتے ہوئے کہا ہے کہ پاکستان اورترکیہ کے درمیان مختلف شعبوں میں تعاون بڑھانے کی ضرورت ہے۔اس میوزیم کے ذریعے ریڈیو پاکستان کے کردار اور تاریخی پس منظر کو آئندہ وقت کیلئے محفوظ کیا، جو قومیں ماضی پر فخر نہیں کرتیں وہ کبھی ترقی نہیں کرتیں۔
برصغیر کے مسلمانوں کو پتالگا کہ ترکی کے مسلمانوں کو ہماری مدد کی ضرورت ہے، برصغیر کے لوگوں نے مشکل وقت میں ترکیہ کے عوام کی مدد کی، پاکستان اور ترکیہ کی دوستی کی طویل تاریخ ہے، پاکستانی عوام ترکیہ کو اپنا دوسرا گھر سمجھتے ہیں، پاک ترکیہ فرینڈ شپ ریڈیو میوزیم کا قیام اہمیت کا حامل ہے۔ریڈیو پاکستان کی نمائندگی پر فخر ہے، قائداعظم کی ریڈیو پر ریکارڈ تقاریر بھی ہم نے سنیں، بہت سے لوگوں نے ریڈیو پاکستان سے کیریئر کا آغاز کیا، آج ہماری اکانومی زراعت پر منحصر ہے، زراعت کے حوالے سے ریڈیو پر معلومات دی جاتی تھیں، معیشت کی بہتری میں بھی ریڈیو کا کردار اہم رہا ہے۔
دنیا میں اتنی خیرات کوئی اور قوم نہیں کرتی جتنی پاکستانی کرتے ہیں، آزاد کشمیر میں زلزلہ آیا تو پورے پاکستان سے لوگ امدادی سامان لیکر پہنچے، عوام کو ریڈیو پاکستان کے کردار سے اجاگر کرنا ہے۔ریڈیو پاکستان ہم سب کا ادارہ ہے،اس کی فلاح وبہبود ہم سب کی ذمہ داری ہے، میوزیم کے قیام کا مقصد آئندہ نسلوں کو پاک ترکیہ تعلقات کی اہمیت سے روشناس کرانا ہے۔