آرمی چیف سے کمانڈر امریکی سینٹ کام کی ملاقات،دفاعی تعاون پر گفتگو

راولپنڈی:آرمی چیف جنرل سید عاصم منیر سے امریکی سینٹرل کمانڈر کے کمانڈر جنرل مائیکل ایرک کوریلا نے ملاقات کی۔پاک فوج کے شعبہ تعلقات عامہ آئی ایس پی آر کے مطابق کمانڈر امریکی سینٹ کام جنرل ایرک کوریلا جی ایچ کیو پہنچے جہاں انہوں نے یادگار شہداء پر پھولوں کی چادر چڑھائی۔پاک فوج کے چاق وچوبند دستے نے انہیں گارڈ آف آنر پیش کیا۔کمانڈر سینٹ کام نے آرمی چیف جنرل سید عاصم منیر سے ملاقات کی جس کے بعد وفود کی سطح پر اجلاس ہوا۔کمانڈر سینٹ کام نے دہشتگردی کیخلاف جنگ میں پاکستان کی کامیابی کو سراہا،انہوں نے سیلاب میں امدادی سرگرمیوں اور علاقائی امن کے لئے پاکستان کے کردار کی تعریف کی۔امریکی فوجی وفد آج ضلع خیبر میں پاک افغان طورخم بارڈر کا دورہ بھی کرے گا جہاں اسے انسداد دہشتگردی اور پاک افغان سرحد پر نافذ بارڈرمینجمنٹ طریقہ کار سے آگاہ کیا جائے گا۔