پنجاب ، مزید 1077بچے نمونیا میں مبتلا ، 12 انتقال کرگئے

پنجاب میں گزشتہ 24 گھنٹوں کے دوران مزید ایک ہزار 77 بچے نمونیا کا شکار ہوئے جب کہ نمونیا کے باعث 12 بچے جاں بحق ہوگئے۔محکمہ صحت پنجاب کا کہنا ہے کہ پنجاب میں 24 دنوں میں 11 ہزار 597 بچے نمونیا کا شکار ہوئے جب کہ 24 دنوں میں نمونیا سے 220 اموات ہوئیں۔لاہور میں 24 گھنٹوں کے دوران 251 بچے نمونیا سے متاثر ہوئے ہیں۔ڈائریکٹر امیونائزیشن ڈاکٹر مختار نے کہا ہے کہ پنجاب میں ان دنوں نمونیا پھیل رہا ہے، نمونیا کی ویکسین پیدائش سے ڈیڑھ ماہ تک کے بچے کو مخصوص نمونیہ سے بچاتی ہے، ان دنوں بڑے پیمانے پر پھیلنے والے وائرل نمونیا میں نمونیا کی ویکسین کارآمد نہیں ہے۔ڈاکٹر مختار کا کہنا ہے کہ حفاظتی ٹیکہ جات کے تحت لگنے والی نمونیا ویکسین وافر مقدار میں موجود ہے، بچوں اور بڑوں کے لیے نمونیا کی ایک ہی ویکسین ہوتی ہے، عام مارکیٹ میں نمونیا ویکسین دستیاب نہیں۔انہوں نے کہا کہ حکومتی اجازت کے بغیر کوئی فارمیسی نمونیا ویکسین بیرون ملک سے نہیں منگوا سکتی، حکومت بیرون ملک سے صرف بچوں کو حفاظتی ٹیکہ جات کے تحت لگنے والی ویکسین منگواتی ہے۔