آج چارسدہ میں آئندہ کا لائحہ عمل دونگا، پہلے ٹیسٹ میچ، پھر ٹی 20 اورآخر میں ٹی 10 کھیلیں گے: سہیل آفریدی

پشاور: وزیراعلیٰ خیبرپختونخوا سہیل آفریدی نے بھانہ ماڑی میں کارکنوں سے خطاب کرتے ہوئے کہا کہ یہ بلاول اور مریم والا لانگ مارچ نہیں ہے، آج چارسدہ میں آئندہ کا لائحہ عمل دوں گا، پہلے ٹیسٹ میچ، پھر ٹی ٹوئنٹی اورآخر میں ٹی ٹین کھیلیں گے۔

سہیل آفریدی کا کہنا تھا کہ ہم آئین و قانون کے دائرے میں رہتے ہوئے سیاسی و جمہوری جدوجہد جاری رکھیں گے۔انہوں نے کہا کہ ہم نے 7 مطالبات پیش کیے، ایک مطالبہ بھی غیر قانونی ثابت کر دیں، ہم سیاسی اور جمہوری قوت ہیں، ہماری جدوجہد آئین اور قانون کے اندر رہ کر ہوگی۔

وزیر اعلیٰ سہیل آفریدی کا کہنا تھا کہ خیبرپختونخوا حکومت کی کارکردگی پر سوال اٹھانے والے بوکھلاہٹ کا شکار ہیں، کے پی کو ڈیجیٹل گورننس ایوارڈ ملا، صوبائی اسمبلی نے دنیا بھر میں پہلی پوزیشن حاصل کی۔سہیل آفریدی نے کہا کہ اس سے پہلے جب ہماری حکومت تھی جو لانگ مارچ لیکر آتے تھے وہ فکس میچ کے ساتھ آتے تھے، اس دفعہ فکس میچ نہیں ہے۔