صدر ٹرمپ کے حکم پر امریکی فوج کے ہاتھوں گرفتار کیے گئے وینزویلا کے صدر نکولس مادورو نے نیویارک جیل سے اپنی نئی تصاویر سوشل میڈیا پر جاری کی ہیں
امریکی اخبار کے مطابق نکولس مادورو نے سوشل میڈیا پلیٹ فارم ‘ایکس’ (سابقہ ٹویٹر) پر خاکستری رنگ کے ٹریک سوٹ میں اپنی دو تصاویر شیئر کی ہیں۔
وینزویلا کے جبراً معزول اور گرفتار کرکے نیویارک جیل میں اسیری کاٹنے والے نکولس مادورو نے کہا کہ میں چاہتا ہوں، آپ جان لیں کہ ہم آپ کی محبت سے بھرے دل کے ساتھ مضبوط کھڑے ہیں۔
اگرچہ یہ تصاویر اتوار کو شیئر کی گئیں لیکن ان پر موجود ٹائم اسٹیمپ ظاہر کرتا ہے کہ یہ 25 جون کو لی گئی تھیں یعنی وینزویلا میں آنے والے اس شدید زلزلے کے اگلے ہی دن جس میں ساڑھے 6 ہزار سے زائد افراد ہلاک ہوگئے تھے۔
ان تصاویر کے سامنے آنے پر سوشل میڈیا صارفین شدید حیرت کا اظہار کر رہے ہیں۔ کئی صارفین نے سوال اٹھایا ہے کہ امریکی تحویل میں موجود ایک قیدی کو سوشل میڈیا استعمال کرنے اور تصاویر پوسٹ کرنے کی اجازت کیسے مل سکتی ہے؟
یہ تصاویر ایک ایسے وقت میں سامنے آئی ہیں جب حال ہی میں ڈونلڈ ٹرمپ نے وینزویلا کے ساتھ ایک مبینہ بڑے تیل کے معاہدے کا اعلان کیا ہے۔ اس معاہدے کے تحت امریکا کو وینزویلا کے 65 ارب بیرل سے زائد کے تصدیق شدہ تیل کے ذخائر پر اکثریتی کنٹرول حاصل ہو جائے گا۔
وینزویلا مادورو پر الزامات اور پس منظر
وینزویلا کے سابق صدر نکولس مادورو اور ان کی اہلیہ سیلیا فلورس کو رواں سال جنوری میں امریکی فوجی آپریشن کے دوران ان کے محفوظ ترین صدارتی محل سے رات گئے اہلیہ کے ہمراہ بیڈ روم سے گھسیٹتے ہوئے حراست میں لیا تھا۔
امریکا نے ویزنویلا صدر نکولس مادورو پر منشیات اسمگلنگ اور دہشت گردی کی سازش کرنے اور امریکا میں کوکین اسمگل کرنے کے سنگین الزامات عائد کر رکھے ہیں۔ جس کی سماعت نیویارک عدالت میں جاری ہے۔
جہاں وفاقی استغاثہ نے الزام عائد کیا ہے کہ وینزویلا کے صدر نکولس مادورو نے کشتیوں اور مال بردار جہازوں کے ذریعے منشیات امریکا منتقل کرنے والے کارٹلز اور گینگز کی قیادت کی۔
دوسری جانب، نکولس مادورو نے عدالت میں پہلی پیشی کے دوران ان تمام الزامات کو مسترد کرتے ہوئے صحتِ جرم سے انکار کیا ہے اور خود کو وینزویلا کا آئینی صدر قرار دیا ہے۔
اگر امریکی عدالت میں یہ جرم ثابت ہو گیا تو نکولس مادورو کو عمر قید کی سزا ہو سکتی ہے۔ اس ہائی پروفائل کیس کا باضابطہ ٹرائل 1 جون 2027 کو شروع ہونے والا ہے۔
واضح رہے کہ نکولس مادورو کو صدر ٹرمپ کا سخت ناقد سمجھا جاتا ہے۔ وہ اپنے جلسوں میں ٹرمپ کی نقل بھی اتارا کرتے تھے اور اسی عمل نے امریکی صدر کے غصے کو جنم دیا تھا۔