ماں گھروں میں کام کرتی رہی، باپ کباڑ بیچتا رہا، بیٹے نے لاہور بورڈ میں دوسری پوزیشن حاصل کر کے تاریخ رقم کر دی
محدود وسائل، غربت اور سخت حالات بھی ایک ہونہار طالب علم کے عزم کے سامنے رکاوٹ نہ بن سکے۔ گھروں میں محنت مزدوری کرنے والی ماں اور کباڑ کا کام کرنے والے باپ کے بیٹے نے شاندار کارکردگی کا مظاہرہ کرتے ہوئے 1112 نمبر حاصل کر کے لاہور بورڈ میں دوسری پوزیشن اپنے نام کر لی۔
طالب علم کی کامیابی نے ثابت کر دیا کہ اگر محنت، لگن اور حوصلہ مضبوط ہو تو مشکلات بھی راستہ نہیں روک سکتیں۔ معاشی مشکلات کے باوجود والدین نے اپنے بیٹے کی تعلیم جاری رکھنے کے لیے ہر ممکن قربانی دی، جس کا صلہ آج انہیں اس تاریخی کامیابی کی صورت میں ملا۔
کامیاب طالب علم کا کہنا تھا کہ اس کی کامیابی کا سہرا والدین کی بے مثال قربانیوں، دعاؤں اور اساتذہ کی رہنمائی کو جاتا ہے۔ اس نے کہا کہ وہ مستقبل میں بھی اسی جذبے کے ساتھ تعلیم جاری رکھ کر اپنے والدین اور ملک کا نام روشن کرنا چاہتا ہے۔
دوسری جانب اس کامیابی پر اہلِ علاقہ اور اساتذہ نے طالب علم اور اس کے والدین کو مبارک باد دیتے ہوئے کہا کہ یہ کامیابی ان تمام نوجوانوں کے لیے ایک مثال ہے جو محدود وسائل کے باوجود بڑے خواب دیکھتے اور انہیں پورا کرنے کے لیے دن رات محنت کرتے ہیں۔